Jetisý oblysynda tótenshe jaǵdaılar kezinde qaıtys bolǵandar sany 41%-ǵa azaıdy

TALDYQORǴAN. QazAqparat – Jetisý oblysynda tótenshe jaǵdaılar kezinde qaıtys bolǵandar sany 41%-ǵa azaıdy. Bul týraly Tótenshe jaǵdaılar mınıstri ıÝrıı Ilın oblys halqymen kezdesýi barysynda aıtty, dep habarlaıdy QazAqparat vedomstvonyń baspasóz qyzmetine silteme jasap.

«Óńirdegi jaǵdaı turaqty. Esepti kezeńde qaıtys bolǵandar sany 41%-ǵa azaıdy. Tótenshe jaǵdaılar sany 3,5%-ǵa azaıdy. Jalpy, tótenshe jaǵdaı ornyna 1 800-ge jýyq shyǵý júzege asyryldy, 322 adam evakýatsııalandy», - dedi mınıstr.

Vedomstvo basshysy mınıstrliktiń bıylǵy qyzmetiniń qorytyndylary týraly habardar etti. Jumys jospary týraly aıtyp, turǵyndardyń ózekti suraqtaryna jaýap berdi. Sonymen qatar, azamattardy jeke qabyldap, Jetisý oblysyndaǵy TJM bólimsheleriniń ardagerlerimen jáne jeke quramymen kezdesti. Mınıstrlik qyzmetkeriniń mártebesin kóterý jáne jaqyn arada jalaqyny ulǵaıtý boıynsha júrgizilip jatqan jumystar týraly aqparat berdi.

Aıta ketsek, jańadan qurylǵan Jetisý oblysynyń aýmaǵynda mınıstrlik bólimsheleri osy jyldyń tamyzynan bastap jumys isteıdi: Tótenshe jaǵdaılar departamenti, Órt sóndirý jáne avarııalyq-qutqarý jumystary qyzmeti, aýdandyq TJ bólimderi, órt sóndirý bólimderi, ónerkásiptik qaýipsizdik komıtetiniń departamenti, Apattar medıtsınasy, «Qazseldenqorǵaý» ortalyǵynyń fılıaldary.