Jetisý oblysynda tórt túliktiń moınyna túnde janatyn baý taǵyp jatyr

TALDYQORǴAN. QazAqparat - Jetisý oblysynda tórt túliktiń moınyna túnde janatyn baý taǵyp jatyr, - dep habarlaıdy QazAqparat tilshisi.

Jetisý oblysynda túnde jol boıynda júretin jylqylardyń saldarynan kólik apaty kóbeıip, olardyń keıbiriniń sońy kisi ólimine de ákelip jatady. Osy jaıttyń aldyn alý maqsatynda Aqsý aýdanynyń prokýrorlary tórt túliktiń moınyna túnde janatyn arnaıy baý taǵýdy usyndy.

Naryqta baýdyń baǵasy 2 myń teńge turady. Malyn kólik qaǵyp, ábden shyǵynǵa batqan sharýalar qazir jappaı osy sharany qolǵa alyp jatyr.

Aıta keteıik, Aqsý aýdany Almaty-Óskemen tasjolynyń boıynda ornalasqan. Kólik apatynyń basym bóligi Qyzylaǵash aýylynyń mańynda bolady eken. Túnde týra joldyń boıynda turǵan jylqylardy respýblıkalyq trassada úlken jyldamdyqpen kele jatqan kólik júrgizýshileri kórmeı qalyp, apatqa ushyraıdy.

«Bıyl Aqsý aýdany aýmaǵynda 14 jol kólik oqıǵasy bolsa, onyń ishinde 11 kólik oqıǵasy maldy qaǵýmen baılanysty bolyp otyr. Byltyr osyndaı 15 oqıǵa boldy. Almaty-Óskemen respýblıkalyq jolynyń boıynda ıaǵnı, Qyzylaǵash pen Saǵabúıen aýyldarynyń sharýa qojalyqtarymen dóńgelek ústel ótkizilip, maldaryna jaryqty shaǵylystyratyn baýdy kıgizý usynyldy. Olar usynysty qabyldady», - dedi Aqsý aýdany prokýrorynyń mindetin atqarýshy Ádilet Sabyrbaev.