Jetisý oblysynda Sıvers almasynyń tuqymyn saqtap qalýǵa arnalǵan festıval ótti

TALDYQORǴAN. QazAqparat – Jetisý oblysyndaǵy Sarqan aýdanynda Sıvers almasynyń gúldenýine arnalǵan festıval ótti, dep habarlaıdy QazAqparat tilshisi.

Jyldaǵy dástúr boıynsha Terekti ózeniniń jaǵasynda Sıvers almasynyń gúldenýine arnalǵan festıval ótti. Sharanyń basty maqsaty – jabaıy alma aǵashtyń osy tuqymynyń joıylyp ketpeýine jaǵdaı jasaý arqyly óńirdegi taý týrızmin damytý.

Taý jaǵalaı ósetin bul jabaıy almanyń túrin tek Sarqan jerinde kezdestirýge bolady. Bor dáýirinen osy kúnge deıin saqtalyp kelgen jabaıy almanyń 40-qa jýyq túri Jońǵar-Alataýy tabıǵı ulttyq parkiniń aýmaǵynda erekshe qorǵalǵan. Búginde, tabıǵı saıabaqtyń 38 myń gektaryn jabaıy Sıvers almasy alyp jatyr.

Shara aıasynda «Altyn adam» Jetisý sheberleri qolóner buıymdarynyń kórmesi ótti. Ulttyq sport túrlerinen tartysqa toly jarys ta uıymdastyryldy.

Saltanatty shara shymyldyǵyn aýdan ákimi Ǵalymjan Qanatuly ashyp, jıylǵan jurtshylyqty merekemen quttyqtady. Sonymen qatar, festıvalge qazaq estradasynyń jas ánshileri Kalifarniya jáne «Qazaqstan daýysy» mega jobasynyń qatysýshysy Qanay kelip, ásem ánderinen shashý shashty.

«Qazaqstannyń barlyq jeri ózine tán sulýlyǵymen kórkem tabıǵatymen erekshelenedi. Sonyń ishindegi jer jánnaty sanalatyn Jetisýdiń tabıǵatyna tamsanbaıtyn adam joq. Búgingi festıval de Jetisýdyń taǵy bir ásem jeri Sarqanda joǵarǵy deńgeıde ótti. Bizdiń basty maqsatymyz – jabaıy alma tuqymyn saqtap qalý. Búkil álemge osy jerdiń barlyq almanyń ejelgi túp atasy ekendigin odan ári pash etý. Árıne, budan bólek ekologııalyq týrızmdi damytýǵa jaǵdaı jasaý», - dedi ekologııa jáne turaqty damý ınstıtýtynyń dırektory Quralaı Karıbaeva.

Búgingi festıval aıasynda 100 túp alma aǵash kósheti otyrǵyzyldy.