Jetisý oblysynda shaban toıda 6 otbasy baspanaly boldy
Aýdan boıynsha ótken dúbirli toıda ulttyq sport túrlerinen jarystar ótip, jaılaý kórigin qyzdyrdy. Aýdan basshysy Marat Saǵymbek jaılaý tórindegi turǵyndarmen kezdesip, merekelik tilegin jetkizdi.
«Jyl boıy adal eńbek etip júrgen azamattardy eldiń shetinde, jeldiń ótinde qaldyrmaı, árkez osylaı qoldaý kórsetýimiz qajet. Jaılaýda bundaı mereke ótpegeli biraz ýaqyt bolypty. Sondyqtan ózderińizben júzdesip, pikir-keńesterińizdi tyńdaıyq dep merekelik shara ótkizdik. Árqashan eńbekterińiz jemisti bolsyn»,- degen aýdan ákimi 6 otbasyǵa baspana kiltin tabystady.
Jaılaý tórinde baspanaly bolǵan malshylar otbasyn qýantqan jeke sharýa qojalyqtyń basshylary Tasqyn Japarqul, Berik Orazbaı, Kamshat Jaqybaevalar syndy kásipkerler malshylar qaýymyna budan basqa da aqshalaı sertıfıkattar tabystady. Sonyń ishinde «Orazbaı.B» sharýa qojalyǵy óz qyzmetkerlerine 8 mln teńgeni atady.
Jalpy barsha malshy qaýymǵa syı kórsetilip, «Aýyl eńbegi úshin» arnaıy tósbelgisi basqa da er-turman, jádigerlermen marapattaldy.
Sonyń biri 87 jastaǵy Turlybaı Shaýkeev ata. Ómiriniń 50 jyldan astamyn osy Beljaılaýdyń tórinde ótkizgen malshy qarııa osy kúnine shúkirshilik aıtady.
«6 balamdy osy malmen asyradym. Barlyq bala-shaǵama baspana, kólik alyp berdim. Maldyń berekesi bar. Osy jaılaý meniń ómirim. Bundaı toı jıi ótkeni durys. Medal alyp jatyrmyn. Óte qýanyshtymyn» dep aǵynan jarylǵan ata jastardy mal baǵýǵa shaqyrdy.
Búginde aýdanda 105 611 bas iri qara, 379 458 qoı-eshki, 22 535 jylqy jáne 370 bas túıe bar. Dástúrli Shaban toı merekesi óńirde aryqaraı jalǵasyn tappaq.