Jetisý oblysynda respýblıkalyq mańyzy bar «Saryózek-Kóktal» joly jabyldy
08:59, 13 Shilde 2023
TALDYQORǴAN. QazAqparat - Jetisý oblysynda respýblıkalyq mańyzy bar «Saryózek-Kóktal» joly jabyldy. Ol aımaqta jóndeý jumystary júrgizilýde, - dep habarlaıdy QazAqparat tilshisi.
«Kazahavtodor» JShS oblystyq fılıalynyń habarlaýynsha, burǵylaý-jarý jumystary júrgizilýde. Osyǵan baılanysty 13 shilde kúni saǵat 09:00-dan bastap bul baǵytta qozǵalys toqtaıdy.
«Saryózek-Kóktal» Respýblıkalyq mańyzy bar avtojolynyń qaıta jańartý ýchaskesiniń 45-68 km aralyǵynda avtokóliktiń barlyq túrleri úshin qozǵalys jabyldy»,- delingen Jetisý oblystyq Tótenshe jaǵdaılar departamenti baspasóz qyzmetiniń habarlamasynda.
Jetisý oblysynyń TJD azamattardan osy baǵytta jol júrýden bas tartýdy jáne óz baǵytyn aldyn ala túzetýdi, sondaı-aq 112 qyzmeti beretin SMS habarlamalardy nazardan tys qaldyrmaýdy suraıdy.