Jetisý oblysynda oqýshy muǵalimmen jaǵa ustasyp qaldy

TALDYQORǴAN. QazAqparat – Prokýratýra Jetisý oblysynda oqýshynyń muǵalimmen tóbeleskenin rastady. Al, oqıǵa Qaratal aýdanynyń ortalyǵy Úshtóbe qalasynyń Frýnze atyndaǵy mektebinde bolǵan, dep habarlaıdy QazAqparat tilshisi.

«Sabaq arasyndaǵy uzaq úzilis kezinde muǵalim men oqýshy arasynda kıkiljiń týyndaǵan. Ustaz oqýshyǵa eskertý jasaǵan, al bul jaıt balaǵa unamaǵan kórinedi. Muǵalim aýrýhananyń kómegine júginbegen, polıtsııaǵa aryz jazýdan bas tartqan. Aýdannyń prokýratýrasy baryp, mektepte profılaktıkalyq jumys júrgizdi. Al, oqýshynyń ata-anasy balasyn basqa aýdandaǵy mektepke aýystyrý jóninde sheshimge keldi. Jaýapty mekemeler oqıǵany qadaǵalaýǵa aldy», - delingen Jetisý oblysy prokýratýrasynyń baspasóz qyzmetiniń habarlamasynda.

Aıta keteıik, muǵalimge judyryq ala júgirgen oqýshy 8-synypta oqıdy. Al, oqıǵa 14 sáýirde bolǵan.