Jetisý oblysynda naýqasqa birden tórt ota jasaldy

TALDYQORǴAN. QazAqparat - Taldyqorǵan qalasyndaǵy oblystyq kardıologııalyq ortalyqta bir naýqasqa birden tórt ota jasaldy, dep habarlaıdy QazAqparat tilshisi.

Júregi aýyryp, aýa jetpeı demigip, jıi sharshap qalatynyna shaǵymdanǵan 71 jastaǵy naýqas barlyq qajetti medıtsınalyq zertteý-dıagnostıkalaý sharalarynan ótip, kardıologtyń keńesine júgingen. Sol mezette naýqastyń aýyr jaǵdaıyn kórgen ortalyqtyń kardıologtary men kardıohırýrgtary tez arada shuǵyl medıtsınalyq keńes ótkizip, ota jasaý úshin naýqasty kardıohırýrgııa bólimine jatqyzady. «Jalpy eki jarym saǵatta ashyq júrekke jasalǵan ota barysynda júrektegi mıtraldy klapan tolyqtaı alynyp tastalyp, ornyna bıoklapan ornatyldy. Trıkýspıdaldy klapanǵa plastıka jáne radıojıilik ablıatsııa qosa jasalyp, júrektiń qulaqshasy tigildi. Bul bolashaqta uıyǵan qannyń tamyr arqyly mıǵa ótýi ıaǵnı, ınsýltti boldyrmaý úshin jasalatyn ádis», - dedi ortalyqtyń dırektory Nursan Surashev.

Sátti jasalǵan otadan keıin qazir naýqastyń jaǵdaıy turaqty jáne aldaǵy ýaqytta ortalyqtan shyǵýy josparlanǵan.