Jetisý oblysynda memleket menshigine qaıtarylǵan jer turǵyndarǵa berile bastady
Qaratal aýdanynda ótken jyly 15 myń gektar jaıylym qaıtarylsa, bıyl taǵy 22 myń gektar memleket menshigine ótti. Úshtóbelik Turarbek Qurmanbekov bıyl kóktemde jer bólý baıqaýyna qatysyp, 1 000 gektar jaıylymnyń ıesi atandy. Ol jerge 50 bas jylqy jiberip, 20 buqany bordaqylaýdy josparlap otyr. Alǵan jer telimi basqa bireýdiń ıeleginde bolyp, uzaq jyldar boıy bos jatqan. Mal basyn ósirip, eńbek etemin degen jandarǵa bul jaqsy múmkindik deıdi sharýa.
«Bıyldan bastap men baıqap otyrmyn, menimen birge 20-30 adamdaı jer aldy. Beker jatqansha adamdar paıdalaný kerek ol jerdi. Paıdasyn kórý kerek», – deıdi Úshtóbe qalasynyń turǵyny Turarbek Qurmanbekov.
Igerilmegen alqaptar qaıtarylyp jatqanymen, tórt túligi órgen aýylǵa keń óris kerek. Bir úıde kem degende eki sıyr bolsa, endi biriniń on shaqty bas maly bar. Eldimeken mańyndaǵy jaıylymdardyń tarlyq etýi de osydan. Mal basyn retteıtin ortaq ereje joq.
«Keıbir úılerde 100 bas. 100 bastan da asyp ketetin jaǵdaılar bar. Sondyqtan da bizdiń oıymyz boıynsha búginde aýyl mańynda jaıylym jetpeı jatqany osy jaǵdaı. Sondyqtan da biz joǵaryda aıtyp ótken qyzmettik hatymyzda sol jaǵdaıdy kórsetip jazdyq», – dedi Qaratal aýdanynyń prokýrory Marat Qasymov.
Jalpy, Jetisý oblysy boıynsha 860 myń gektar jerdiń bos jatqany anyqtaldy. Bıyl onyń 220 myń gektary memleket menshigine ótýi tıis.