Jetisý oblysynda medıtsınalyq pýnkter 20 kúnde salynyp jatyr

TALDYQORǴAN. QazAqparat - Densaýlyq saqtaý salasyn jańǵyrtý jobasy aıasynda 2025 jylǵa deıin Jetisý oblysynda 15 dárigerlik ambýlatorııa salynady. Munan bólek, 39 feldsherlik-akýsherlik jáne 5 medıtsınalyq pýnkt qurylysy josparlanǵan, dep habarlaıdy QazAqparat tilshisi.

Keı aýyldarda qurylys bastalyp ketti. Bir ereksheligi emdeý mekemeleri jańa ádispen jyldam salynady. Máselen, Alakól aýdany Eńbekshi aýylyndaǵy medıtsınalyq pýnkt 20 kúnde salynyp bitedi. Blokty-modýldi ǵımarattyń aldymen, temir qańqasy turǵyzylady. Odan keıin qabyrǵalary jylý saqtaıtyn materıalmen qaptalady. Aýdanda dál osyndaı eki pýnkt salynyp jatyr.

«Qolaıly ári arzan. Sendvıch paneldermen qaptalady. Іshinde 12 bólme bolady. Bir jobamen salynyp jatyr. Qazir bizde jumys istep jatqan 15 shaqty adam bar», - dedi qurylysshy Erkebulan Ádilhan.

Aýdan ortalyǵynan 30 shaqyrym qashyqta ornalasqan aýyl úshin medıtsınalyq pýnkt aýadaı qajet. Mundaǵy emdeý mekemesi birneshe jyl buryn órtenip ketken. Halyq medıtsınalyq qyzmetke júginý úshin Úsharal qalasyna baratyn. Al Eńbekshide eki myńǵa jýyq turǵyn bar.

Dál osyndaı modýldi ǵımarat Jetisý oblysynyń ózge de aýdandarynda salynyp jatyr. Jalpy aldaǵy eki jylda óńirde 50-ge jýyq emdeý mekemesin jańartý kózdelgen.