Jetisý oblysynda mas júrgizýshiniń kesirinen jolaýshy mert boldy

TALDYQORǴAN. QazAqparat - Jetisý oblysynda kólikti ishimdik iship alyp júrgizgen adamnyń kesirinen jolaýshy mert boldy, - dep habarlaıdy QazAqparat tilshisi.

4 sáýirde Panfılov aýdanynda Mitsubishi Galant avtokóligi kólik apatyna ushyrady. Japondyq shetel kóliginiń 32 jastaǵy júrgizýshisi Penjim-Yntymaq avtojolynda rýldi basqara almaı, jol boıyndaǵy beton qorshaýlaryna soǵylǵan.

Aýrýhanaǵa jetkizilgen kezde kóliktegi 37 jastaǵy jolaýshy qaıtys boldy. Avtokólik júrgizýshisi jeńil jaraqat alyp, medıtsınalyq tekserýden keıin ambýlatorııalyq emdelýge jiberildi.

«Anyqtalǵandaı, júrgizýshi avtokólikti mas kúıinde basqarǵan. Bul medıtsınalyq kýálandyrýmen rastalady. Іs boıynsha tergeý amaldary QR QK 345-1-babynyń 3-bóligine sáıkes (Abaısyzda adam ólimine alyp kelgen, alkogoldik masań kúıde KK basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) júrgizilýde. Apatqa kináli adamdy qamaýǵa alý máselesi qarastyrylýda», - dedi Panfılov aýdandyq polıtsııa bastyǵynyń orynbasary Ernar Qaltaev.

Jyl basynan beri oblysta mas júrgizýshilerdiń kesirinen 4 jol-kólik oqıǵasy tirkeldi. Onda 1 adam qaza taýyp, 4 adam zardap shekti.