Jetisý oblysynda lıtsenzııa ala almaǵan kásipkerdiń quqy qorǵaldy

TALDYQORǴAN. QazAqparat – Jetisý oblysynda memlekettik kirister departamenti kásipkerge lıtsenzııa berýden negizsiz bas tartqan. Antıkor qyzmetkerleri aralasqannan keıin qyzmet alýshynyń quqyǵy qorǵaldy, dep habarlaıdy QazAqparat tilshisi.

«Jetisý oblysy boıynsha memlekettik kirister departamenti kásipkerge qyzmetti júzege asyrý mekenjaıy boıynsha biliktilik talaptaryna sáıkes keletin bastapqy obekt joq ekendigin dáleldeı otyryp, lıtsenzııa berýden bas tartty. Departamenttiń aralasýymen birlesken kezdesý uıymdastyrylyp, taldaý júrgizildi. Taldaý nátıjeleri boıynsha «jyljymaıtyn múlik tizilimi» júıesinde aqparattyń durys kórsetilmeýi, ıaǵnı qatelikter anyqtaldy. Qabyldanǵan sharalardyń nátıjeleri boıynsha kásipkerge tıisti lıtsenzııa berildi», - delingen Sybaılas jemqorlyqqa qarsy is-qımyl agenttigi Jetisý oblysy boıynsha departamentiniń habarlamasynda.

Aıta keteıik, kásipker atalǵan máselesi boıynsha Jetisý oblysynyń Sybaılas jemqorlyqqa qarsy qyzmetine jáne «Atamaken» kásipkerler palatasy fılıalyna júgingen.