Jetisý oblysynda kólik apatynan 2 adam mert bolyp, tórteýi aýrýhanaǵa tústi
Jetisý oblystyq Polıtsııa departamenti baspasóz qyzmetiniń málimetinshe, jol-kólik oqıǵasy Panfılov aýdanynda boldy.
«Saryózek-Kóktal» avtojolynyń 99-shaqyrymynda «Subaru Forester» avtokóligi «SHACMAN» júk kóligimen soqtyǵysqan. Japondyq sheteldik kóliktiń 50 jastaǵy júrgizýshisi oqıǵa ornynda kóz jumdy. Sondaı-aq aýrýhanaǵa jetkizilgen kezde sol kólikte bolǵan 45 jastaǵy jolaýshy da qaza tapty. Zardap shekken 4 adam aýyr jaraqatpen aýrýhanaǵa jatqyzyldy.
«Atalǵan fakti boıynsha tıisti saraptamalar taǵaıyndaı otyryp, sotqa deıingi tergeý amaldary bastaldy.
Jetisý oblysynyń polıtsııasy júrgizýshilerdi avtokólikti basqarý kezinde muqııat bolýǵa jáne QR Jol erejelerin qatań saqtaýǵa shaqyrady. Júrgizýshilerdiń árqaısysy ózi úshin ǵana emes, jolaýshylarynyń ómiri úshin de jaýapty ekenin qaperde ustaýy kerek», - delingen Polıtsııa departamenti baspasóz qyzmetiniń habarlamasynda.