Jetisý oblysynda qant qyzylshasy alqaby birte-birte ulǵaıtylmaq

NUR-SULTAN. QazAqparat – Jetisý oblysyndaǵy qant qyzylshasy alqabyn ulǵaıtý úshin sý resýrsy máselesin sheshý kerek. Sondaı-aq, jergilikti zaýyt pen sharýashylyqtar arasynda tyǵyz baılanys ornatylýy mańyzdy. Aqsý aýdanyna barǵan saparynda aımaq basshysy Beıbit Isabaev osyǵan nazar aýdardy, dep habarlaıdy QazAqparat oblys ákiminiń baspasóz qyzmetine silteme jasap.

Uzaq jyl toqtap turǵan turǵan Aqsý qant zaýyty iske qosylǵannan keıin onyń jobalyq qýaty 450 myń tonna qant qyzylshasyn óńdeýge jetken. Shıkizat jetispeýshiligi týyndaǵandyqtan, zaýyt qamys qantyn óńdeý jelisin de iske qosý jumystaryna kirisken. Osy oraıda, oblys ákimi qant qyzylshasynyń alqaby birte-birte ulǵaıtylatynyn aıtty.

«Eń aldymen, sýaratyn sýdyń máselesin sheshýimiz kerek. Qazir sýarý kanaldaryn qaıta jańǵyrtyp, qalpyna keltirip jatyrmyz. Qant qyzylshasyn da, qant qamysyn da qatar óńdeımiz. Kóksý qant zaýyty sonyń arqasynda jyl boıy úzdiksiz jumys istep tur. Osyndaı júıege Aqsý zaýyty da kóshýi kerek», - dedi Beıbit Isabaev.

Ákim zaýyttyń irgeli kásiporyn retinde qant qyzylshasynyń sapasyn kóterý isine belsene atsalysýy tıistigine toqtaldy.

«Memleket qajetti kómek jasap otyr, soǵan laıyq sizderdiń tarapyńyzdan da bastamalar bolýy kerek. Qyzylsha ósirýshi sharýashylyqtarmen birigip jumys istep, olarǵa járdem jasap otyrsańyzdar, eki tarapqa da tıimdi bolar edi. Qazir alqaptardaǵy jumystyń basym bóligi qol kúshimen atqarylady, bul – aýyr eńbek, sondyqtan ony mehanıkalandyrýǵa nazar aýdarý kerek», - dedi oblys ákimi.

Al, aýdandaǵy sý jetispeýshiligin sheshýge Qyzylaǵash sý qoımasynyń qalpyna keltirilgeni áserin tıgizbek. Sý qoımasynyń tolyq syıymdylyǵy – 42 mln tekshe metr. Munda qazir nysannyń qaýipsizdigi men shydamdylyǵyn tekserý protsesteri júrip jatyr. Sý qoımasy arqyly 7 myń gektarǵa jýyq jerdi sýmen qamtý kezeń-kezeńimen iske asyrylady dep josparlanyp otyr.

Foto: gov.kz