Jetisý oblysynda gazdandyrý boıynsha 6,6 mlrd teńge bólindi
Osylaısha Tekeli qalasyndaǵy gaz tartý men sýmen qamtý máseleleri de sheshimin tappaq. Bul el Prezıdentiniń ótken jyly Jetisý óńirine kelgen saparynda bergen tikeleı tapsyrmasy bolatyn. Osy aýqymdy jobalar boıynsha qandaı jumystar atqaryldy jáne alda qandaı mindetter tur degen saýaldarǵa turǵyn úı-kommýnaldyq salanyń mamandary men qurylys jumystaryn júrgizýshi mergider uıym ókilderi jaýap berdi.
Tekeli qalasynyń turǵyn úı-kommýnaldyq sharýashylyǵy, jolaýshy kóligi, avtomobıl joldary jáne turǵyn úı ınspektsııasy bóliminiń basshysy Ǵalym Qyzylbaevtyń aıtýynsha, jobany iske asyrý jumystary ótken jyldyń qazan aıynda bastalǵan bolatyn, 2024 jyldyń sońynda aıaqtalady dep mejelenip otyr. Qazirgi kezde qajetti 195 shaqyrym gaz taratý jelisiniń 4,2 shaqyrymy tóselgen. «Álııa-Servıs» JShS-men 5,6 mlrd. teńgege kelisimshart jasalǵan. Qarjy kezeń-kezeńimen bólinetin bolady.
«Bul – aýyspaly joba. Ony júzege asyrý arqyly monoqalany gazdandyrýǵa múmkindik týady. Jeke turǵyn úılermen qatar áleýmettik nysandar da, ónerkásip oryndary da kógildir otynǵa qosylady. Tekelilikterdi jylýmen qamtamasyz etýshi Tekeli energokombınatqa jańǵyrtý jumystary júrgiziledi. Sóıtip JEO da gazǵa kóshiriledi, bul óz kezeginde qalanyń ekologııasyna da oń yqpal etedi», - deıdi Ǵ. Qyzylbaev.
Búginde qurylys ýchaskelerine 17 arnaıy tehnıka men 70 adam jumyldyrylǵan.
«Jer asty gaz qubyrlaryn tóseýge qazir aýa raıy qolaısyz, bir metr tereńdikke deıin jer qatyp jatyr. Sondyqtan jumys toqtap qalmaý úshin biz jobanyń 2-shi, 3-shi kezeńderine de qatar kiristik. Qazirgi kezde 3 ýchaskede joǵary qysymdy, 5 ýchaskede tómengi qysymdy gaz qubyrlaryn tóseý jumystary bir mezgilde júrgizilýde. Osy jyly búkil jumystyń 70% bitiremiz dep josparlap otyrmyz», - deıdi ýchaske bastyǵy Murat Jıenbaev.
Sondaı-aq «Dostyq» shaǵyn aýdanynyń problemalyq máseleleri de sheshiledi.
Eske salsaq, Tekeli qalasyn gazdandyrý úshin 2018 jyly «Taldyqorǵan - Tekeli» joǵarǵy qysymdy gaz qubyrynyń qurylysy júrgizilgen bolatyn. «Jetisý OblGaz» JShS men «Ac-Tac Invest» JShS arasynda 2017 jyly Eskeldi aýdanynyń eldi mekenderi men Tekeli qalasyna aýyl ishilik gaz júıeler salý men iske qosýǵa konsortsıým kelisimsharty jasalǵan. Kelisimshartqa sáıkes «Ac-Tac Invest» JShS 10,4 mlrd. teńge ınvestıtsııa quıyp, jobany qarjylandyrýy kerek edi. Alaıda ózine júktelgen mindetterdi kompanııa oryndaı almady, sondyqtan 2019 jyldyń sáýir aıynda «Jetisý OblGaz» JShS kelisimshartty buzatyndyǵy týraly habarlama joldap, keıin sotqa talap aryz túsirdi. Aqyry 2020 jyldyń maýsym aıynda kelisimshart buzyldy. Bul rette «As-tas Invest» JShS halyqtan qarjy jınap, uzyndyǵy 5,1 shaqyrym gaz qubyryn tósegen. Qazirgi kezde 93 abonent tabıǵı gazǵa qosylyp, kógidir otyndy paıdalanyp otyr, al taǵy 33 úıdiń turǵyndaryna gaz sol kúıi jetkizilmeı qalǵan. Osyǵan baılanysty jańa jobanyń І kezeginiń 2-shi iske qosý keshenine osy problemalyq ýchaske de engizilip otyr, al «As-tas Invest» JShS atalǵan úıler turǵyndarynyń jańa gaz qubyryna qosylýdaǵy shyǵyndaryn ótep beretin bolady.