Jetisý oblysynda frı kartoby ósiriletin bolady
QR AShM-nan málim etkendeı, Á.Tamabek aldymen, k artop ósirýge mamandanǵan iri sharýa qojalyqtarynyń ókilderimen kezdesken. Keıin Nıderland kompanııasynyń ókilderimen birge ındýstrııalyq aımaqta ınfraqurylymy daıyn jáne jańa azyq-túlik óndirisi salynýy múmkin ındýstrııalyq aımaqtaǵy ýchaskeni qarap shyqty.
Sapardyń sońynda vıtse-mınıstr Jetisý oblysynyń ákimi Beıbit Isabaevpen jáne «Farm Frites Kazakhstan» JShS basshysy Iozef Boermen kezdesti. Taraptar Qazaqstanda kartop ındýstrııasyn damytý jónindegi josparlaryn talqylap, zaýyttyń bolashaqta ornalasatyn jerin talqylady.
«Joba júzege sátti asyrylatyn bolsa, óndirýshiler sanynyń kóp bolýy qajet etiledi. Osyǵan oraı 10 000 gektar alqapta kartop ósirý boıynsha fermerlik sharýashylyqtyń qosymsha jobasyn iske asyrý josparlanyp otyr.
Sonymen qatar, ınvestıtsııalar týraly kelisim jasasý múmkindigi qarastyrylyp jatyr. Onda barlyq taraptyń áleýmettik-ekonomıkalyq mindettemeleri retteledi jáne «Farm Frites» kompanııasynyń biriktirilgen frı kartop zaýytyn salý kezinde memlekettik qoldaý sharalary naqty belgilenedi», - delingen mınıstrlik habarlamasynda.
Aıta keteıik, «Farm Frites» (Farm Frites Beheer B. V.) kompanııasynyń ókilderi 5 jyldan astam ýaqyt boıy Qazaqstannyń birqatar óńirinde kartop pen kartop tuqymyn tájirıbe retinde otyrǵyzyp keledi. Olar joǵary sapadaǵy jáne zaýyttyń qajettilikteri úshin qajetti kólemdegi kartopty jetkizýdi, sondaı-aq jergilikti fermerlerdi oqytýdy kózdep otyr.
1971 jyly Nıderlandta otbasylyq kásiporyn retinde qurylǵan «Farm Frites» kompanııasynyń negizgi qyzmeti - kartoptan muzdatylǵan jáne salqyndatylǵan ónimder óndirý. Álemniń 40 elinde 6 zaýyty men 40 satý keńsesi bar, onda barlyǵy 1500 qyzmetker jumys isteıdi. «Farm Frites» - álem boıynsha frı óndirisi boıynsha tórtinshi orynda turǵan jáne McDonalds, KFC jáne basqa da fast-fýd meıramhanalarynyń negizgi halyqaralyq jetkizýshileriniń biri.
Foto: QR Aýyl sharýashylyǵy mınıstrligi