Jetisý oblysynda fıto-veterınarııalyq zerthana salynady

TALDYQORǴAN. QazAqparat – Qytaımen birlesip Jetisý oblysynyń Alakól aýdanyndaǵy «Dostyq» beketinde fıto-veterınarııalyq zerthana salý josparlanyp otyr. Bul týraly óńirlik ákimdiktiń baspasóz qyzmetinen málim etti, dep habarlaıdy QazAqparat tilshisi.

Oblys ákimi Beıbit Isabaev Qytaı Halyq Respýblıkasynyń Qazaqstandaǵy Elshisi Chjan Sıaomen beınebaılanys arqyly perspektıvalardy talqylady. Onyń barysynda Qytaı tarapy Alakól aýdanynyń «Dostyq» beketinde fıto-veterınarııalyq zerthana salýdy usyndy. Ákimdik dereginshe, bul joba aýyl sharýashylyǵy taýarlaryn eksporttaý rásimderin aıtarlyqtaı jeńildetedi.

«Óńirdiń tranzıttik áleýetin arttyrý – bizdiń áriptestik qarym-qatynastarymyzdyń eń perspektıvaly baǵyttarynyń biri. Agrarlyq sala, jańartylatyn energııa kózderi, qurylys materıaldaryn óndirý, týrızm, farmatsevtıka, sondaı-aq mıneraldy shıkizatty óndirý jáne qaıta óńdeý yntymaqtastyqtyń basym baǵyttary bolmaq», - dedi Beıbit Isabaev.

Oblys basshysynyń aıtýynsha, «Dostyq» beketinde salynatyn jańa termınal Qazaqstan-Qytaı shekarasynda jylyna 9 mln tonnaǵa deıin júk pen 300 myń konteınerdi tıeýge jáne ony saqtaýǵa qaýqarly. Qurylys quny 25 mlrd teńgege baǵalanǵan.

Foto: gov.kz