Jetisý oblysynda brýtsellez ben sibir jarasynyń oshaqtary kóbeıgen

TALDYQORǴAN. QazAqparat – Jetisý oblysynda jarty jyl ishinde brýtsellez aýrýynyń 58 jaǵdaıy tirkeldi. Bul – ótken jylmen salystyrǵanda 14-ke kóp. Epıdemıologııalyq qolaısyzdyq Aqsý, Alakól, Eskeldi, Qaratal aýdandaryn qamtyp otyr. Bul týraly Jetisý oblysy sanıtarııalyq-epıdemıologııalyq departamentiniń basshysy Ashat Charapıev málim etti, dep habarlaıdy QazAqparat tilshisi.

Aıtýynsha, ótken jylmen salystyrǵanda syrqattanýshylyq balalar arasynda 4, jasóspirimder arasynda 1 jaǵdaıǵa artyq. Tirkelgen 58 naýqastyń 45-inde juǵý qaýpi usaq múıizdi maldan, 7-inde iri qara maldan anyqtalǵan.

Al, sibir jarasy boıynsha oblysta 97 statsıonarlyq qolaısyz pýnkt, 158 topyraqtyq oshaq esepke alynǵan.

«Brýtsellez de, sibir jarasy da aýylsharýashylyǵy maldarynan juǵatynyn eskere kele, ruqsat etilmegen saýda oryndarynan, veterınarııalyq tańbasyz et satyp almańyz jáne satýshylardan veterınarııalyq ilespe qujattardy surańyz. Mal qorany jınaǵan kezde, terimen, júnmen jáne taǵy basqa materıaldarmen jumys istegende arnaıy kıimmen júrý kerek. Adamdar men janýarlardy sibir jarasy vaktsınasymen egý mańyzdy», - dedi Ashat Charapıev baspasóz máslıhatynda.

Profılaktıkalyq is-sharalardyń jyldyq josparyna sáıkes sibir jarasyna qarsy vaktsınamen qamtamasyz etý deńgeıi 100%-ǵa jetken. Bıyl 3 mln jýyq doza respýblıkalyq menshikten Jetisý oblysynyń kommýnaldyq menshigine qabyldandy.