Jetisý oblysynda bıyl 321,9 myń sharshy metr baspana qoldanysqa beriledi

TALDYQORǴAN. QazAqparat – Jetisý oblysynda turǵyn úı kezeginde 29,1 myń adam tursa, sonyń 15 myńnan astamy Taldyqorǵanda tirkelgen, dep habarlaıdy QazAqparat.

Búgin Jetisý oblysynyń ákimi Beıbit Isabaev jýrnalısterge arnalǵan brıfıngide málim etkendeı, bıyl óńirde 321,9 myń sharshy metr turǵyn úı qoldanysqa beriledi.

Spıker óz baıandamasynda 2022 jyly 295,3 myń sharshy metr baspana paıdalanýǵa berilgenin atap ótti. Al bıyl bul kórsetkish 321,9 myń sharshy metrdi quramaq. Sonyń 50% nemese 166,6 myń sharshy metri bıýdjet esebinen salynady. Bul ótken jylmen salystyrǵanda 8 esege kóp.

«Jalpy jyl sońyna deıin 2975 páter beriledi, sonyń ishinde bıýdjet esebinen – 2542, jeke qurylys salýshylar esebinen – 233, demeýshiler esebinen – 200 páter, sonyń ishinde Taldyqorǵan qalasy boıynsha – 1917 páter beriledi», - dedi B.Isabaev.

Sol sııaqty brıfıngide halyqtyń áleýmettik áljýaz toptaryna, kópbalaly otbasylar úshin Taldyqorǵan qalasynda demeýshiler esebinen 180 páterlik úsh úı jáne 20 jeke turǵyn salynyp jatqany aıtyldy. Oǵan qosa «Samuryq-Qazyna» qory da turǵyn úı máselesin sheshýge úles qosýda. Máselen, qor osy jyldyń ekinshi jartysynda Taldyqorǵan jáne Panfılov aýdanynda 500 páterlik kópqabatty 8 úıdiń qurylysyn bastap, Kerbulaq aýdany Saryózek aýyly 65 jeke turǵyn úı salýdy josparlap otyr.

Beıbit Isabaev óńirdegi apatty úılerdiń máselesine de toqtaldy. Onyń aıtýynsha, bıyl Aqsý, Kerbulaq aýdandary men Tekeli, Taldyqorǵan qalalarynda 232 páterdi satyp alýǵa 2,8 mlrd teńge qarastyryldy. Sondaı-aq Tekeli qalasynyń Saryózek aýylynda 60 páterlik 2 úı salynyp jatyr. Osylaısha kelesi jyly apatty úıler máselesi Jetisý oblysynda tolyǵymen sheshiledi.