Jetisý oblysynda bıyl 12 blok-modýldi medıtsınalyq keshen iske qosylady

TALDYQORǴAN. QazAqparat - Jetisý oblysynda taǵy bir blok-modýldi medpýnkt iske qosyldy, dep habarlaıdy QazAqparat.

«Aýyldyq jerlerdegi medıtsınalyq qyzmet sapasyn jaqsartý maqsatynda qolǵa alynǵan qurylys nysany Alakól aýdanynyń Kókjar aýylynda turǵyzyldy. Bul - oblysta bıylǵa josparlanǵan on eki mekemeniń jetinshisi», - dep jazdy Jetisý oblysy ákiminiń baspasóz qyzmeti.

Bul medıtsınalyq pýnkt Kókjar aýylynyń 160 turǵynyna qyzmet kórsetedi.

Jobanyń jalpy quny – 39 mln. teńge. Ǵımarattyń aýmaǵy – 108 sharshy metr. 12 turǵynjaıy bar, atap aıtqanda vestıbıýl, dáliz, dárihanasy bar tirkeý orny, akýsherlik qabyldaý bólmesi, egý bólmesi, protsedýralyq kabınet, materıaldar alý men zertteý bólmesi, orta medıtsınalyq qyzmetkerler bólmesi, 2 dárethana, sol sııaqty basqa da turmystyq-sharýashylyq qajettiliktegi turǵynjaılary bar. Ystyq sý, jylý júıesi júrgizilgen, jeldetkish ornatylǵan.

Jalpy jyl sońyna deıin óńirde taǵy 5 blok-modýldi keshendi iske qosý josparlanǵan. Aqsý, Alakól, Eskeldi, Kóksý, Qaratal jáne Kerbulaq aýdandarynda jalpy quny 900 mln teńge bolatyn barlyǵy 12 nysan josparlanǵan.

Mamandardyń aıtýynsha, blok-modýldi keshender berik, qarapaıym ornatylatyn, uzaq qyzmet etetin qurylys túri. Sonymen birge qolaısyz aýa raıyna tótep bere alady, olardyń qyzmet etý merzimi 30 jyl dep mejelenedi.