Jetisý oblysynda bes myń gektardan astam jerdi nebary 4 adam ıelenip alǵan
Ótken jyly Jetisý oblysynda memleket menshigine 128,5 myń gektar aýyl sharýashylyǵy maqsatyndaǵy jer qaıtarylyp, 650 myń gektar jaıylym aınalymǵa engizildi.
Osy jyly 220 myń gektar aýyl sharýashylyǵy maqsatyndaǵy jer qaıtarylady dep josparlanyp otyr, onyń 216 myńy - jaıylym, 3 myńy - egistik, 656 gektary - shabyndyq.
Bul jerler zańǵa sáıkes konkýrs negizinde aınalymǵa engiziledi. Bul jóninde oblys ákimi Beıbit Isabaev Aqsý aýdanynyń turǵyndarymen kezdesýi barysynda jetkizdi.
Máselen, jer qatynastary salasynda túıtkildi máseleler Aqsý aýdanynda áli de kóp.
Máselen, aýdanda 500 gektardan astam aýylsharýashylyq jerdi 386 adam ıelenip otyrsa, sonyń ishinde 4 azamattyń ıeligindegi jer kólemi 5 myń gektardan asady.
Qazir sol ıgerilmeı jatqan jerlerdi qaıtarý jumysy júrgizilip jatyr.
Sondaı-aq, aýdanda jaıylymdardy basqarý jospary bekitilmegen. Jospar bekitilgen jaǵdaıda, aýyl turǵyndarynyń malyn jaıylymmen qamtamasyz etip, halyq muqtajyn qanaǵattandyrýǵa bolar edi.
Jáne Jer kodeksiniń talaptaryn saqtaý boıynsha aýdandyq jer komıssııasynyń múshelerin oqytýdy uıymdastyrý kerek.
«Aqsý aýdanynda ırrıgatsııalyq jeliler men qurylystardy salý baǵytynda 2 iri joba iske asyp jatyr. Ótken jyly Qyzylaǵash sýarý massıviniń qurylysy bastaldy, respýblıkalyq bıýdjetten 7,9 mlrd teńge bólindi. Sonyń nátıjesinde buryn ıgerilmeı jatqan 5,3 myń gektar sýarmaly jer aınalymǵa engiziledi. Islam Damý Banki arqyly da 6,3 mlrd teńgege aýdannyń sýarý jelileri qaıta jańartylyp jatyr. Búgingi tańda jumys tek 70 paıyzǵa oryndalǵan. Merdiger «Tomas» JShS jumys kestesinen keshigip jatyr, ol týraly Ekologııa mınıstrligi habardar etilgen. Bıyl da jumysqa kirispeıtin bolsa, kelisimshartty buzamyz», - dedi B.Isabaev.
Oblys basshysy «Qazsýshar» mekemesi ırrıgatsııalyq jelilerdegi jumystardyń barysyn qatań baqylaýǵa alyp, vegetatsııalyq kezeń bastalǵanǵa deıin sharýashylyqtardy sýarmaly sýmen tolyq qamtamasyz etýi tıis ekenin aıtty.