Jetisý oblysynda áıeldiń úıine qarýly shabýyl jasap, 22 mln teńgeniń múlkin alyp ketkender ustaldy

TALDYQORǴAN. QazAqparat - Jetisý oblysynda betperde kıgen belgisiz bireýler 28 jastaǵy jergilikti turǵynnyń úıine kirip, kúsh kórsetip 22 mln teńgeniń dúnıesin alyp ketken, - dep habarlaıdy QazAqparat tilshisi.

Bul fakt Panfılov aýdanynda tirkeldi. 21 sáýirde polıtseılerge Kóktal aýylyndaǵy jer úıge qaraqshylyq shabýyl jasalǵany týraly habarlama tústi. Úıdiń ıesi 28 jastaǵy áıel, onyń aıǵaqtaryna sáıkes betperde kıgen eki belgisiz er adam úıge basyp kirip, qymbat zattar men Toyota Camry kóligin alyp ketken.

Belgili bolǵandaı, olar áıeldi baılap, pyshaqpen qorqytyp, qolma-qol aqsha talap etken. Sondaı-aq, jábirlenýshini arasynda tunshyqtyrǵan. Oılaǵandaryn iske asyra almaǵannan keıin, qaraqshylar eki qymbat telefon, gaýhar tastary bar zergerlik buıymdar, noýtbýk, ámııan jáne aýlada turǵan sheteldik kólikti alyp ketken.

Jábirlenýshige keltirilgen shyǵyn shamamen 22 mıllıon teńgeni qurady.

«Aýdandyq polıtsııa qyzmetkerleri oblystyq urımınaldyq polıtsııa jáne uıymdasqan qylmysqa qarsy kúres basqarmasy jedel ýákilderiniń kómegimen kúdiktilerdi anyqtaı aldy. Olardyń biri 23 jastaǵy jergilikti, ekinshisi Kóksý aýdanynyń buryn sottalǵan 29 jastaǵy turǵyny bolyp shyqty. Ekeýi de ustalyp, qamaýǵa alyndy. Urlanǵan zattardyń barlyǵy, sonyń ishinde urlanǵan kólik tabylyp, zańdy ıesine qaıtaryldy», - dedi Panfılov aýdandyq polıtsııa bólimi bastyǵynyń orynbasary Ernar Qaltaev.

Atalǵan fakti boıynsha Qazaqstan Respýblıkasy Qylmystyq kodeksiniń 192-babynyń 4-bóligi (asa iri mólsherde jasalǵan qaraqshylyq) boıynsha tergeý amaldary júrgizilip jatyr.