Jetisý oblysynda 6 jasar bala attan qulap mert boldy

TALDYQORǴAN. QazAqparat - Jetisý oblysynyń Panfılov aýdanynda 6 jasar bala attan qulap mert boldy, dep habarlaıdy QazAqparat tilshisi.

Polıtsııa anyqtaǵandaı, bala shaýyp bara jatqan attyń ústinen qulaǵan. Ol ákesimen qystaqqa barǵan. Sol jerde atqa otyryp júrgisi kelgen.

Biraq asaý at oǵan baǵynbaǵan. Shaýyp bara jatqan attyń ústinen qulaǵan balanyń aıaǵy jylqynyń úzeńgisine qysylyp qalǵan.

«Oqıǵa 11 qazan kúni Jeruıyq aýylynda bolǵan. Jarkent qalasyndaǵy aýrýhanaǵa balany aýyr halde jetkizgen. Ómirine arasha túsken dárigerlerdiń kómegine qaramastan ol birneshe saǵattan keıin kóz jumdy. Ata-analardan balalaryna úlken jaýapkershilikpen qaraýdy suraımyz. Sebebi, bala ózine tónip turǵan qaýipti túsinbeıdi. Arty qaıǵyly jaǵdaıǵa ákelýi múmkin»,- delingen Jetisý oblystyq polıtsııa departamenti baspasóz qyzmetiniń habarlamasynda.