Jetisý oblysynda 327 myń ga jaıylymdyq jer aınalymǵa endi

TALDYQORǴAN. QazAqparat – Jetisý oblysynda 327 myń ga jaıylymdyq jer aınalymǵa endi. Bul týraly búgin ortalyq kommýnıkatsııalar qyzmetiniń uıymdastyrýymen ótken aımaq basshysy Beıbit Isabaevtyń brıfınginde aıtyldy, dep habarlaıdy QazAqparat Jetisý oblysy ákiminiń baspasóz qyzmetine silteme jasap.

Spıker óz sózinde Memleket basshysynyń ótken jyly oblysqa kelgen saparynda bergen birqatar tapsyrmasyna sáıkes atqarylǵan jumystardyń qatarynda paıdalanylmaı jatqan jerlerdi qaıtarý sharalarynyń baryna toqtalyp ótti.

Máselen, ótken jyly aeroǵaryshtyq túgendeý jumystary nátıjesinde paıdalanylmaı jatqan aýyl sharýashylyǵy maqsatyndaǵy 1,077,2 myń ga jer anyqtalǵan, onyń 857,2 myńy – jaıylymdyq jer. Búginde qabyldanǵan sharalardyń arqasynda 327 myń ga jaıylymdyq jer aınalymǵa engizilgen, 401,7 myń ga jer ıelerine zań buzýshylyqtardy joıýǵa 1 jyl merzimge nusqamalar berilse, 128,5 myń ga jer memleket menshigine qaıtarylǵan (6,9 myń ga egistik jer: 3,6 myń – sýarmaly, shabyndyq – 300 ga, jaıylym – 121,3 myń ga). Qalǵan 220 myń gektar bıyl qaıtarylýy tıis. Búgingi kúnge qaıtarylǵany – 101,4 myń ga.