Jetisý oblysynda 300 asa moped pen samokat júrgizýshilerine aıyppul salyndy
Oblystyq polıtsııa departamenti baspasóz qyzmetiniń málimetinshe, 12 adam tynyshtyqty buzǵan, 11júrgizýshi tehnıkalyq baqylaýdan ótpegen, 53-i jol erejesin saqtamaǵan, sondaı-aq birqatary baǵdarshamnyń qyzyl túsine júrý syndy ózge de zań buzýshylyqtarǵa jol bergen.
Jetisý oblysynyń avtojoldarynda polıtseıler mototsıkl, skýter jáne moped júrgizýshileriniń qatysýymen bolatyn oqys oqıǵalardyń aldyn alý jumystaryn kúsheıtti. Tek sońǵy úsh kúnde patrýldik polıtsııa qyzmetkerleri 301 ereje buzýshyny jaýapqa tartty.
«Qazirgi ýaqytta kóliktiń bul túrin paıdalaný bizdiń oblys turǵyndary arasynda óte kóp. Jol qozǵalysy erejeleri barlyǵyna birdeı. Olardy saqtaý skýter, elektrskýteri, moped jáne mototsıkl júrgizýshileri úshin de birdeı mindet. Ádette, jol qaýipsizdigi talaptaryn elemeýdiń saldary qaıǵyly jaǵdaılarǵa ákelip soǵady. Osyǵan baılanysty polıtsııa óńirde jolda júrý erejesin buzýshylyqtardy eskertý jáne aldyn alýǵa baǵyttalǵan «Mototsıkl» profılaktıkalyq is-sharasyn ótkizýge bastamashy boldy», – dedi Jetisý oblysy Polıtsııa departamenti Jol polıtsııasy basqarmasynyń bastyǵy Qaısar Muhmetov. Belgili bolǵandaı, quqyq buzýshylardyń kóbi Taldyqorǵan qalasynda anyqtaldy. Baǵdarsham sıgnalyna qaramaı ótý, manevr jasaý, jaıaý júrginshilerge basymdyq bermeý, túngi ýaqytta tynyshtyqty buzý, mas kúıinde júrgizý, jol-kólik oqıǵasyn týdyrý jáne motoshlemdi kımeý sııaqty buzýshylyqtar jıi kezdesedi.