Jetisý oblysynda 25 jastaǵy esirtki satýshy 10 jylǵa sottaldy
Jetisý oblystyq polıtsııa departamenti baspasóz qyzmetiniń málimetinshe, 25 jastaǵy esirtki satýshy birneshe aı buryn Kóksý aýdanynda «Almaty-Óskemen» avtojolynda ustalǵan bolatyn. Jeke tekserý, sondaı-aq, kúdiktiniń turǵylyqty jeri boıynsha sanktsııalanǵan tintý kezinde 2,5 keliden astam túrli sıntetıkalyq esirtki tabylyp, tárkilendi. Sonymen qatar, ustalǵan adamnan ártúrli býyp-túıgish materıaldar, tarazylar jáne basqa da zattar tabyldy.
Jas jigit ınternet jelisinde sıntetıkalyq esirtkini «jasyryn tyǵýshy» retinde jumys istegendigi, ony Taldyqorǵan qalasy men onyń mańynda satqandyǵy belgili boldy.
«Qylmystyq ister boıynsha mamandandyrylǵan aýdanaralyq sottyń sheshimimen kúdikti QR QK-niń 297-baby úshinshi bóliginiń 1,2,3,5-tarmaqtarynda (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) kózdelgen qylmystyq quqyq buzýshylyq jasaǵany úshin kináli dep tanyldy. Sottalýshy 10 jylǵa bas bostandyǵynan aıyrý jazasyn qatań rejımdegi qylmystyq-atqarý júıesiniń mekemelerinde óteıdi», – dedi Jetisý oblysy PD Esirtki qylmysyna qarsy is-qımyl basqarmasynyń bastyǵy Murat Jumabaev.
Bıyl oblystyq polıtsııa qyzmetkerleri esirtki qylmysyna qatysty 60 kúdiktini ustap, zańsyz aınalymnan 30 keliden astam túrli esirtkini tárkiledi.