Jetisý oblysynan Májiliske bir mandatty saılaý okrýgi boıynsha 18 kandıdat usynyldy

TALDYQORǴAN. QazAqparat - Jetisý oblysynda 19 naýryzǵa belgilengen Parlament Májilisi men máslıhat depýtattaryn saılaýǵa daıyndyq jumystary jalǵasýda, dep habarlaıdy QazAqparat tilshisi.

Saıası naýqanǵa daıyndyq boıynsha júrgizilip jatqan jumystar týraly oblystyq aýmaqtyq saılaý komıssııasynyń tóraǵasy Tımýr Dáýitov aıtyp berdi.

«Negizgi is-sharalardyń josparyna sáıkes úmitkerlerdi usyný 20 qańtarda bastalyp, 8 aqpanda aıaqtaldy. Barlyǵy 597 kandıdat usynyldy. Onyń ishinde: Májiliske – 18, oblystyq máslıhatqa partııalyq tizimder boıynsha – 66 kandıdat, bir mandatty okrýgter boıynsha – 63, aýdandyq jáne qalalyq máslıhattarǵa 450 kandıdat bar. Bir mandatqa orta eseppen - 3,3 adam», – dep atap ótti spıker.
Jetisý oblysynan usynylǵan 597 úmitkerdiń barlyǵy qoıylatyn talaptarǵa sáıkestigi tekserildi. Prokýratýra men kóshi-qon polıtsııasyna tıisti saýaldar joldandy. Nátıjesinde 3 úmitker irikteýden óte almady.
«QR Parlamenti Májilisine №17 bir mandatty saılaý okrýgi boıynsha 18 kandıdat usynyldy. Qazirdiń ózinde 13 adam tirkeldi. Oblystyń 11 máslıhatynda 168 depýtat, onyń ishinde 32 oblystyq máslıhat, 136 aýdandyq jáne qalalyq máslıhat depýtattary saılanady», – dedi T.Ermekuly.
Oblystyq máslıhat depýtattaryn saılaý boıynsha partııalyq tizimderdi 6 saıası partııa usyndy. Atap aıtsaq, «Amanat», «QHP», «Aýyl», «Respýblıka», «Baıtaq» jáne «Aqjol» partııalary. Barlyǵy 66 úmitker.
«Oblystyq máslıhat depýtattaryn saılaý boıynsha 16 bir mandatty aýmaqtyq saılaý okrýgi boıynsha 63 kandıdat usynyldy. Búgingi tańda barlyǵy – 43 tirkelgen. Aýdandyq jáne qalalyq máslıhattar depýtattaryn saılaý boıynsha barlyǵy 450 kandıdat usynyldy, onyń 284-i ózin-ózi usyný arqyly, 166-sy saıası partııalardan, 346 kandıdat tirkeldi», – dedi oblystyń aýmaqtyq saılaý komıssııasynyń tóraǵasy.
Kúntizbelik josparǵa sáıkes úmitkerlerdi tirkeý 18 aqpan kúni saǵat 18.00-de aıaqtalady. Sonan keıin úmitkerler saılaý aldyndaǵy úgit-nasıhatqa kirisedi.
Saılaýǵa barlyǵy 11 aýmaqtyq, 145 okrýgtik jáne 458 ýchaskelik saılaý komıssııalary, 3764 komıssııa músheleri qatysady. Saılaýshylar sany shamamen 450 000 adamdy quraıdy.
«Ýchaskelik komıssııalar kelesi aptadan bastap jumysqa kirisedi. Saılaýǵa daıyndyq jumystary jalǵasýda», – dep sózin qorytyndylady Tımýr Dáýitov.