Jetisý oblysyna qansha ınvestıtsııa tartyldy

TALDYQORǴAN. QazAqparat – Jyl basynan beri Jetisý oblysynyń ekonomıkalyq kórsetkishteri artyp, óndiris, qurylys, saýda sııaqty negizgi salalarda ósim baıqaldy. Búgingi kúnge deıin óńir ekonomıkasyna 95,3 mlrd teńge ınvestıtsııa tartylady, dep habarlaıdy QazAqparat tilshisi.

Jetisý oblysy ákiminiń baspasóz qyzmetiniń málimetinshe, birinshi jartyjyldyqtyń qorytyndysy boıynsha oblys ekonomıkasynyń barlyq negizgi salalarynda oń dınamıka saqtaldy.

Máselen, ónerkásipte ósim 10,3% - 152,4 mlrd teńge, aýyl sharýashylyǵynda – 1,5% , ıaǵnı 104,9 mlrd teńge, qurylys jumystarynyń kólemi 1,9 ese artty. Jyl basynan beri 103,9 myń sharshy metr turǵyn úı paıdalanýǵa berildi. Jyl basynan beri 1,3% ósimmen 95,3 mlrd teńge ınvestıtsııa tartyldy.

Al bıýdjettiń ıgerilýi ázirge 99,4%. Jyl sońyna deıin tolyq ıgerý kózdelgen. Bıyl oblys bıýdjeti – 486 mlrd teńge, ıaǵnı 16 paıyzǵa ósken.

Buǵan deıin Jetisý oblysynyń ákimi Beıbit Isaev keńes barysynda, 7 aıdaǵy oblystyń qorytyndysy jaman emes ekenin aıtqan bolatyn.

Ákimniń sózinshe, óńirde paıdalanylmaǵan áleýet áli de bar.

«Investıtsııa tartýda maqsatty jumys isteýimiz kerek. «Dostyq – Moıynty» temir jol ýchaskesiniń ekinshi jolynyń qurylysy, «Qorǵas» HShYO-daǵy jańa kásiporyndar, «Aksenger LTD» JShS altyny bar kenderdi óndirý jáne óńdeý metallýrgııalyq kesheni, «Kóksaı taý ken baıytý kesheni sııaqty iri jobalar halyqty jumyspen qamtýǵa, ınvestıtsııanyń kólemin arttyrýǵa yqpal etýi tıis», - degen bolatyn Beıbit Isabaev aýdan ákimderimen ótken jıynda.

Aıta keteıik, byltyr Jetisý oblysy ekonomıkadaǵy negizgi 7 kórsetkish boıynsha jospardy tolyq oryndady. Kórsetkishterge kelsek, óńir ınvestıtsııa tartýda ekinshi, turǵyn úı qurylysynda úshinshi orynda. Máselen, ınvestıtsııa kólemi 2021 jylmen salystyrǵanda 16,3 % artyp, 269,7 mlrd. teńge ınvestıtsııa tartylǵan.

Al turǵyn úı salý jospardyń 108,8% qurap, bir jylda 295 myń sharshy metr turǵyn úı paıdalanýǵa berilgen.

Memlekettik bıýdjet kiristeri boıynsha jospar 132,8% oryndalyp, 198,1 mlrd. teńge túsken, sonyń ishinde respýblıkalyq bıýdjetke – 135,8 mlrd. teńge nemese 129,5%, jergilikti bıýdjetke 62,3 mlrd. teńge túsken nemese bul josparlanǵan kórsetkishtiń 140,5%-y.

Osylaısha Jetisý oblysy ekonomıkalyq damý kórsetkishteri jaǵynan 2022 jyldy jaqsy aıaqtap, oblystar arasynda tórtinshi orynǵa turaqtalǵan bolatyn.