Jetisý oblysy taýlaryndaǵy órtti sóndirý úshinshi kúnge sozyldy

TALDYQORǴAN. QazAqparat – Jetisý oblysynyń taýlaryndaǵy, atap aıtqanda «Dostyq» stantsııasy mańynda dala órtin sóndirýge 232 adam men 2 tikushaq jumyldyryldy, dep habarlaıdy QazAqparat tilshisi.

Oblystyq tótenshe jaǵdaılar departamentiniń málimetinshe, 10 qyrkúıek kúni tańerteń órt oshaqtaryn anyqtaý úshin MI-171 tikushaǵymen komıssııalyq baqylaý júrgizildi. Aýmaqtyń orman alqabynda 125 ga bolatyn úsh byqsý oshaǵy anyqtaldy.

«Saǵat 10:30-da tikushaqtarmen eki ret sý tógildi – 6 tonna sý. Jalpy, úsh kún ishinde 22 ret sý tógildi (66 tonna sý). Órt sóndirý jumystary jalǵasyp jatyr», - dep habarlady TJD-nyń baspasóz qyzmeti.

Órtti sóndirýge barlyǵy 232 adam, 2 tikushaq, 26 tehnıka, 60 aspaly búrikkish jáne 11 jylqy jumyldyryldy.

Qazgıdromettiń habarlaýynsha, 10 qyrkúıekte Jetisý oblysynyń taýly jáne taý bókteri aýmaqtarynda naızaǵaı boljanady.

Buǵan deıin Jetisý oblysynda taýda tutanǵan órt Qytaı shekarasyna jetken. Qyzyl jalyn kórshi memlekettiń kúshimen sóndirildi.

8 qyrkúıek kúni saǵat 4:30-da oblystyq tótenshe jaǵdaılar departamentine Alakól aýdanynda «Dostyq» stantsııasy mańyndaǵy «Kendir saqal» orman sharýashylyǵy aýmaǵynda órt shyqqany týraly habarlama túsken. Órtti sóndirýge orman sharýashylyǵynyń, jergilikti atqarýshy organdardyń kúshteri men quraldary jáne QR UQK shekara qyzmetiniń áskerı qyzmetkerleri tartyldy.