Jetisý oblysy qurylǵan bir jylda 38 mlrd teńgeniń 47 jobasy iske asyryldy

TALDYQORǴAN. QazAqparat – Jetisý oblysy qurylǵannan beri jalpy quny 38 mlrd teńge bolatyn 47 joba iske asyrylyp, 1 myńnan astam jumys orny ashyldy, dep habarlaıdy QazAqparat Jetisý oblysy ákiminiń baspasóz qyzmetine silteme jasap.

Jetisý oblysynda 2026 jylǵa deıingi ınvestıtsııalyq portfelge quny 1,6 trln teńge bolatyn, 7,1 myń jumys orny qurylatyn 146 joba qalyptastyryldy. Oblys qurylǵannan beri jalpy quny 38 mlrd teńgelik, bir myńnan astam jumys orny bar 47 joba iske asyrylsa, sonyń ishinde ishinde 1,7 mlrd teńgeniń 68 jumys orny bar 8 jobasy jyl basynan beri júzege asyrylǵan. Búgin brıfıng ótkizgen oblys ákimi Beıbit Isabaev óz sózinde jobalardyń ishindegi irilerine toqtaldy.

«On jyldam astam ýaqyttan beri toqtap turǵan joǵary markaly kremnıı óndiretin, qýaty 6 myń tonnalyq «Kazsilicon» zaýyty qaıta jańǵyrtylyp, iske qosyldy. Oǵan 3,9 mlrd teńge ınvestıtsııa tartylyp, 210 jumys orny ashyldy. Tekeli qalasynda temirdi tikeleı qalpyna keltiretin, qýaty 20 myń tonnalyq «Elektromarganets» zaýyty jumys isteı bastady. Jańǵyrtýdan ótkizilgen Aqsý qant zaýyty osy jyldyń tamyz aıynda iske qosylady dep josparlanyp otyr», - dedi ákim.

Sondaı-aq, «Kóksaı» ken orny men taý-ken baıytý kombınaty qurylysynyń jobasyn iske asyrý jumystary bastaldy. Kombınat 50 mln tonna ken óńdeýge qaýqarly. Oǵan 976 mlrd teńge ınvestıtsııa tartylyp, 2 300 jumys orny quryldy. Kombınat 2026 jyly iske qosylady.