Jetisý aýdanyndaǵy opyrylǵan jol aıdyń aıaǵyna deıin jóndeledi - Almaty ákimi

ALMATY. QazAqparat – Almaty ákimi Erbolat Dosaev qyrkúıek aıynyń sońyna deıin Jetisý aýdany Eıhe kóshesiniń boıyndaǵy jol jamylǵysyna qatysty máseleler sheshilýi kerektigin aıtty, dep habarlaıdy QazAqparat tilshisi.

Qala ákimimen kezdesý barysynda aýdan turǵyny, múlik ıeleri birlestiginiń tóraǵasy joldyń opyrylyp qalǵan bóligin jóndeýdi surady.

«Jol opyrylyp qaldy, aýlaǵa kiretin jol joq. Merdiger kompanııa shilde aıynda jaýbýǵa ýáde bergen edi. Mashınalar soǵylyp jatyr, adamdar múlik ıeleri birlestigine júginedi, biraq mende ondaı qarajat joq. Mekenjaıy: Eıhe kóshesi, 21», - dedi ol.

Erbolat Dosaev Jetisý aýdanynda «qara tizimge» engen birqatar merdiger bar ekenin atap ótti.

«Ókinishke qaraı, Jetisý aýdanynda «qara tizimge» ilingen merdigerler bar, olar óz jumystaryn nashar oryndap jatyr. Biz olardy aqaýlardy joıýǵa májbúrlep otyrmyz. Siz aıtqan mekenjaı boıynsha ákimdikke tapsyrma beremin. Qyrkúıek aıynyń sońyna deıin jumysty aıaqtaýǵa tyrysamyz. Jaýyp qana qoımaı, jol júrýge yńǵaıly bolýy úshin bar kúshimizdi salamyz, qysta eshqandaı qıyndyq bolmaıdy», - dep jaýap berdi ákim.

Aıtýynsha, bıyl Jetisý aýdanynda 18 kóshede 22 shaqyrym jol ortasha jóndeýden ótedi.

«4 kóshede (Omarov, Qazybaev, Qojamııarov, Qazybaev kóshesi) jol jóndeý jumystary qyrkúıekte, qalǵan 14 kóshede qazan aıynda aıaqtalady. Budan basqa, uzyndyǵy 2,7 km bolatyn 10 ýchaskede trotýarlar salynady. jumystardy aıaqtaý qazan aıyna josparlanǵan», - dedi ol.

Budan bólek, aýdan ákimdigi bıyl berilgen ókilettikter sheńberinde 8 myń sharshy metr bolatyn 11 kóshedegi joldardy jóndeý jumystaryn júrgizáp jatyr. Qazan aıynyń sońyna deıin taǵy 7 myń sharshy metr jol jóndeledi.