Jetisý aýdanynda kásipkerler birneshe áleýmettik nysan qurylysyn qarjylandyrdy

ALMATY. QazAqparat - Almatynyń Jetisý aýdanynda turatyn kásipkerler «Týǵan jer» baǵdarlamasyna belsendi qatysyp, birneshe áleýmettik nysan qurylysyn qarjylandyrǵan. Bul týraly aýdan ákimi Muhtar Tájibaev aıtty, dep habarlaıdy QazAqparat tilshisi.

Búgin Almatydaǵy Óńirlik kommýnıkatsııalar qyzmetinde BAQ aldynda esepti baıandama jasaǵan Jetisý aýdanynyń ákimi Muhtar Tájibaev aýdan demeýshileri men kásipkerleri Elbasymyzdyń «Týǵan jer» baǵdarlamasyna qatysýǵa úlken talpynys bildirgenin aıtty.

««Atameken» baǵdarlamasynyń aıasynda 108 830 000 teńge soma kóleminde 5 jekemenshik balabaqsha, 2 000 000 teńge somasyna  3 shaǵyn ortalyq salyndy. Mektepke deıin tárbıe berý uıymdarynyń ashý úshin 110 830 000 teńge qarajat jumsaldy.  50 mln teńge somasyna haýyzy bar 1 sport kesheni jóndeýden ótti», - dedi ákim.

Aýdan ákimi 30 qarashadaǵy esep boıynsha, jyl basynan beri 3 341 jańa jumys oryny qurylǵanyn aıtty.

«Aýdanda qańtar-qarasha aılarynda negizgi kapıtalǵa salynǵan ınvestıtsııa kólemi - 37 654 mln teńge.  Aýdan boıynsha naqty ortasha aılyq jalaqy kólemi 134 805 teńgege jetti. Aýdanda 3 341 jumys orny ashyldy», - dedi ol. 

Muhtar Tájibaev Jetisý aýdanynda jyl basynan 150-ge jýyq zańsyz jarnama qurylǵysy joıylǵanyn da aıta ketti.

«Mádenıet jáne tilderdi damytý bólimi qyzmetkerleri aptasyna eki ret zańsyz ornatylǵan jarnama nysandaryn tekseredi. Jyl basynan 150-ge jýyq zańsyz jarnama qurylǵysy joıyldy», - dedi ol.