Jetisý ákimi ustalǵan oblystyq bilim bóliminiń býhgalterlerine qatysty istiń mán-jaıyn túsindirdi

ASTANA. QazAqparat – Jetisý oblysynyń ákimi Beıbit Isabaev asa iri kólemde bıýdjet qarajatyn jymqyrdy degen kúdikke ilingen Taldyqorǵan qalalyq bilim bóliminiń qyzmetkerlerine qatysty iske túsinikteme berdi, dep habarlaıdy QazAqparat tilshisi.

«Halyq bul isti «Býhgalterler isi» dep aıtyp júr. Shynymdy aıtsam, men qalalyq bilim berý salasyndaǵy jemqorlyq qylmysymen baılanysty áreketterdiń bar ekeni týraly aqparatty byltyr jeltoqsannyń sońyna deıin estidim. Men quqyq qorǵaý organdaryna olarǵa qatysty kúdiktiń bar ekenin bildirmeı, kásibı túrde tekserý júrgizýdi tapsyrdym. Nátıjesinde osyndaı qylmystarǵa baılanysy bar iri top anyqtaldy. Sot sheshimi shyqqanǵa deıin bul adamdardy qalaı ataý kerektigin bilmeımin. Biraq olar zańdy buzdy, 2 mlrd teńge shyǵyn keldi. Basshy, bas býhgalter, bas ekonomıst jáne Taldyqorǵan qalasyndaǵy 6 mekteptiń býhgalteri ustaldy. Olardyń barlyǵy kinásin moıyndap jatyr», - dedi oblys basshysy Ortalyq kommýnıkatsııalar qyzmetinde ótken brıfıngide.

Onyń aıtýynsha, ustalǵan alty býhgalter úı qamaqta otyr.

Eske salaıyq, buǵan deıin Sybaılas jemqorlyqqa qarsy qyzmet Jetisý oblysy prokýratýrasynyń úılestirýimen Taldyqorǵan qalasynyń bilim bóliminiń qyzmetkerlerin ustady.

Atalǵan azamattarǵa bilim berý salasynda is júzinde jumys istemeıtin úlestes tulǵalardyń paıdasyna jalaqy túrinde óteýsiz qarjy aýdardy, ıaǵnı, asa iri mólsherde bıýdjet qarajatyn júıeli negizde urlar keldi degen aıyp taǵylyp otyr. Aldyn ala keltirilgen zalal somasy shamamen 2 mlrd teńgeni qurady.

Keıin bul iske qatysty tergeý nátıjesinde jańa derekter anyqtaldy. Atap aıtqanda, Taldyqorǵan qalasy bilim bóliminiń basshysy bıýdjet qarajatyn urlaý faktilerin jasyrǵany úshin qaramaǵyndaǵylardan 280 mln teńge para aldy degen kúdikke ilindi.