Jetisaılyq kásipker oblys turǵyndaryna 120 tonna qyryqqabatty tegin taratyp berdi

TÚRKІSTAN. QazAqparat - Jany jomart jandardyń qut mekeni sanalatyn dıqanshylardyń mekeni – Jetisaı aýdanynyń kásipkerleri taǵy da bir saýapty is jasady, dep habarlaıdy QazAqparat Túrkistan oblysynyń Óńirlik kommýnıkatsııalar qyzmetine silteme jasap.

Elimizdegi tótenshe jaǵdaıǵa baılanysty aýdan turǵyndaryna qolushyn sozýdy maqsat etken jeke kásipker Kóbeıbek Alıev bıylǵy egistiginiń birinshi ónimin tolyǵymen qaıyrymdylyqqa arnap otyr. ıAǵnı, jylyna bir jerden eki ret ónim alatyn kásipker-dıqan birinshi ónimnen jınalǵan 120 tonna qyryqqabatty aýdan, oblys kóleminde tegin taratýdy jón kóripti. Qyryqqabattyń alǵashqy 15 tonnasy kórshiles Shardara aýdanyna jiberilse, 150 tonnasy Jetisaı aýdanynyń turǵyndaryna tegin taratyldy. Budan bólek, kásipker suranys túsken ózge aýdandardy da tegin qyryqqabatpen qamtamasyz etýdi nıet etip otyr. Kóbeıbek Alıev buǵan deıin de aýdandaǵy qaıyrymdylyq sharalarynan shet qalyp kórgen emes.

«Bizdiń aýdanda Elbasymyz, partııa Tóraǵasy Nursultan Nazarbaevtyń bastamasymen respýblıka aýmaǵynda júzege asyrylyp jatqan «BizBirgemiz» aktsııasyna qoldaý bildirip, demeýshilik jasaǵan azamattarymyzdyń qatary kún sanap artyp keledi. Jomart jandardyń biri qarjylaı, endi biri azyq-túlikpen, al ózgeleri gıgıenalyq zattarmen bir sózben aıtqanda, árkim óz shama-sharqynsha kómek berýde«,- deıdi NurOtan partııasy Jetisaı aýdandyq fılıaly tóraǵasynyń birinshi orynbasary Ádilhan Asaýov.

Tótenshe jaǵdaı jarııalanǵaly beri NurOtan partııasy Jetisaı aýdandyq fılıaly aýdanyndaǵy túrli deńgeıdegi qaıyrymdylyq sharalaryn uıymdastyryp, az qamtamasyz etilgen jáne kópbalaly otbasylarǵa kómek berý isi kún tártibinen túsirgen emes. Bul is aldaǵy ýaqytta da óz jalǵasyn tabatyn bolady.