Jetisaıdyń qarbyzy Reseıge jóneltilip jatyr

JETІSAI. QazAqparat - Jetisaı aýdany Atameken aýyldyq okrýginde ornalasqan Qoǵaly aýylynyń dıqany Leonıd Shın óz ıeligindegi 2 gektar jerden 25 tonna ónim alǵan, dep habarlaıdy QazAqparat.

Plenka astyndaǵy erte pisetin qarbyz ekken ol jıyn-terim jasap, ónimdi Reseı Federatsııasyna jóneltip jatyr.

«Naýryz aıynyń basynda 55 kúnde pisetin «Vıktorııa» atty qarbyz sortyn eki qabat plenka astyna ektim. Aýa raıy qolaısyz bolǵan kezde ónim dalada qalmasa eken dep azdap ýaıymdadym. Sátin salyp, bári oıdaǵydaı boldy. Satylym baǵasy da kóńilimnen shyqty»,- deıdi sharýa.

Aıta keteıik, Jetisaı aýdany boıynsha aýyl sharýashylyǵy maqsatynda 78 500 gektar aýmaqqa egis egý josparlanǵan.

Sonyń 22 myń gektaryna baqsha daqyldary egilgen.

Onyń ishinde, 14 378 gektaryna plenka astynadaǵy qaýyn, al, 4 900 gektarǵa qarbyz egilgen.

Aýdan boıynsha qazirgi tańda 50 gektar aýmaqta qarbyz ben 15 gektar egistikte qaýyn pisýge jaqyn.