Jetisaıdaǵy aýyl ákimderin para berýge ıtermelegen Antıkor qyzmetkerleri anyqtaldy

ASTANA. QazAqparat - «Jedel-izdestirý qyzmeti týraly» Zańnyń 15-baby qylmystyq qýdalaý organdarynyń qyzmetkerlerine azamattardy quqyq buzýshylyqqa ıtermeleýge jáne arandatýǵa tikeleı tyıym salady. Alaıda keıbir qyzmetkerler bul talapty buzǵandyqtan, ózderi sottalýshylardyń ornynan tabylýda. Bul týraly Bas prokýratýra jazdy, dep habarlaıdy QazAqparat.

«Mysaly, Sybaılas jemqorlyqqa qarsy kúres qyzmetiniń ókilderi Túrkistan oblysy Jetisaı aýdanynyń ákimdigin tekserip, aýyldyq okrýgterdiń ákimderin qylmystyq jaýapkershilikke tartýmen qorqytyp, olardan aqshalaı qarajat talap etken. Olardyń turaqty túrdegi talaptarynan keıin ákimshilik jumyskerleri tekserýshilerge tekseristiń oń sheshilýi úshin 400-myńnan 630-myń teńgege deıingi qarajat berip, para berý deregi boıynsha ustalǵan.

Nátıjesinde 7 aýyldyq okrýgtiń ákimderi men ákimshiliktiń 1 esepshisi sottarmen ártúrli merzimge bas bostandyqtarynan aıyrý jáne aıyppul túrindegi jazalarǵa tartylǵan», - dep málimdedi Bas prokýratýra.

Bas Prokýrordyń narazylyǵymen Joǵarǵy Sot olardy tolyǵymen aqtap, Sybaılas jemqorlyqqa qarsy qyzmeti ókilderiniń is-áreketterinde tikeleı arandatýshylyq bar ekenin anyqtaǵan. Óz kezeginde, 2 jedel ókilge qatysty Qylmystyq kodektiń 362-baby 4-bóligimen (bılikti jáne laýazymdyq ókilettikterdi asyra paıdalaný) sotqa deıingi tergep-tekserý bastalǵan.

Tergep-tekserýdi Bas prokýratýranyń arnaıy prokýrory júrgizip, kinálaryn tolyǵymen dáleldep, qylmystyq is sotqa joldanǵan.

»Túrkistan oblysy Jetisaı aýdandyq sotynyń 2023 jylǵy 26 qańtardaǵy úkimimen aýyr sanattaǵy laýazymdyq qylmys jasaǵandary úshin Sybaılas jemqorlyqqa qarsy qyzmetiniń burynǵy 2 jedel ókili arnaıy shenderinen aıyrylyp, árqaısysy 6 jylǵa bas bostandyqtarynan aıyrý jazasyna tartyldy. Jábirlenýshilerdiń paıdasyna moraldyq zalal óndirildi», - delingen habarlamada.

Úkim zańdy kúshine engen joq, sottalýshylar shaǵymdanǵan.