Jetisaıda sadaq atý kesheni ashyldy

TÚRKІSTAN. QazAqparat - Túrkistan oblysynyń Jetisaı aýdanynda tuńǵysh ret sadaq atý kesheni ashyldy. Munda 100-ge jýyq úmitker ulttyq sport túrimen tegin aınalysady, dep habarlaıdy QazAqparat ákimdikke silteme jasap.

Q.Muńaıtpasov atyndaǵy ortalyq stdaıonda ornalasqan nysannyń ashylýyna aýdan ákimi Serik Mamytov pen Jetisaı aýdandyq sotynyń tóraǵasy Arman Shyndalıev, Maqtaaral aýdandyq sotynyń tóraǵasy Qunanbaı Musaev pen QR UQK Túrkistan oblysy boıynsha departamenti Jetisaı aýdandyq bóliminiń basshysy Nurmahan Ibragım, aýdan prokýrorynyń orynbasary Zaman Zulpyharov pen aýdandyq máslıhat tóraǵasy Medet Qasymov, sport maıtalmandary men ardagerleri qatysty.

Qazaqy jaýyngerlik ónerimiz ben dástúrimizdi jańǵyrtyp, rýhymyzdy oıatatyn, óskeleń urpaqqa sadaq atýdy úıretetin keshenniń mańyzdylyǵyna toqtalyp, jańa sporttyq nysannyń ashylýyna atsalysqan №1 balalar men jasóspirimder sport mektebiniń dırektory Ǵabıt Janaevqa alǵysyn aıtqan el aǵalary nysannyń lentasyn saltanatty túrde qıdy.

Aıta keteıik, mergendik synalatyn sporttyń bir túri sanalatyn sadaq atý burynnan jazǵy Olımpıada oıyndarynyń tizimine kirgen. Shydamdylyq, júıke myqtylyǵy, ótkir kóz jáne qýatty qol – osynyń barlyǵy sadaqpen atqanda jeńiske jetý úshin qajet etetin atalmysh sport túrimen búginde álemniń 140 elinde sportshylar aınalysady.

Al bizdiń elimizde sadaq atý sporty 1967 jyldan bastap damysa, 2021 jyldan beri dástúrli sport túrleriniń tizimine engen.