Jetisaıda kópbalaly 145 otbasyǵa azyq-túlik taratyldy

JETІSAI. QazAqparat - Túrkistan oblysy, Jetisaı aýdanynda qasıetti Ramazan aıynyń qurmettine oraı «Jyly júrek - jomart qol» atty qaıyrymdylyq aktsııasy ótti. Aýdandyq «Nuǵyman» meshiti muryndyq bolǵan sharada 145 otbasyǵa azyq-túlik taratyldy, dep habarlaıdy QazAqparat tilshisi.

Qaıyrymdylyq sharasynda az qamtylǵan, múmkindigi shekteýli jáne kópbalaly januıalarǵa 13500 teńgelik azyq-túlik pen kúndelikti turmystyq zattar sebeti tabys etildi.

«Ramazan - qaıyrymdylyq aıy. Osy qasıetti aıda meshit ujymy men jergilikti jomart jandar birigip, búgingi aktsııany uıymdastyryp otyrmyz. Jyl basynan beri bizdiń meshitte kópbalaly, múmkindigi shekteýli músheleri bar jáne az qamtamasyz etilgen otbasylardyń tizimi jasaqtaldy. Nátıjesinde 500-ge jýyq otbasyn tirkedik. Sóıtip, osy otbasylarǵa jyl boıy qoldaý, járdem berip otyrýdy uıǵardyq. Osy maqsatta búgin 145 otbasyna bir aıǵa jetetin azyq túlik sebetin tartý etip otyrmyz»,- deıdi «Nuǵman» meshitiniń bas ımamy Bekzat Syzdyq.

Aıta keteıik, Ramazan aıy bastalǵaly beri «Nuǵman» meshiti jergilikti kásipkerlermen birlesip, buǵan deıin túrli qaıyrymdylyq aktsııalaryn turaqty túrde uıymdastyryp keledi. Aýdandaǵy kópbalaly 12 otbasyǵa baspana salý isin qolǵa alyp, «Baspanaǵa jol» qaıyrymdylyq sharasy arqyly úısiz júrgen 7 otbasyǵa turǵyn úı satyp alyp bergen bolatyn.