Jetisaıda 12 kópbalaly otbasyǵa arnap baspana salyna bastady

JETІSAI. QazAqparat - Túrkistan oblysy, Jetisaı aýdanynda qasıetti ramazan aıynda kópbalaly 12 otbasyǵa baspana salyna bastady. Qazybek bı aýyldyq okrýginde qolǵa alynǵan ıgi bastama «Baspanaǵa jol» aktsııasy aıasynda júzege asyrylýda, dep habarlaıdy QazAqparat tilshisi.

Aýdan ortalyǵyndaǵy «Nuǵman» meshitiniń ujymy muryndyq bolǵan shara aıasynda jańa baspanalardyń irgetasy quıyldy. Úı irgelik jer telimderin Qazybek bı aýyl okrýginiń basshylyǵy arnaıy bólip bergen. Zamanaýı úlgide boı kóteretin úılerdiń uzyndyǵy - 18, eni - 9,5 metr. Endi birer aıda barlyq qurylys jumystary aıaqtalyp, 12 muqtaj otbasyǵa jańa baspananyń kilti saltanatty túrde tabystalady.

«Atalǵan qorǵa qarjy jınaý úshin barlyq dúkender men saýda oryndaryna arnaıy jáshikter ornatylǵan. Sol jáshikke árkim óz qalaýynsha, jaǵdaıyna qaraı sadaqa retinde qarjy tastaıdy. Jınalǵan qarjyny shashpaı-tókpeı, úı qurylysyna jumsap jatyrmyz. Aýdanymyzda kásipker, qaltaly azamattar az emes. Olar da qoldan kelgenshe járdem berip jatyr», - deıdi ortalyq meshittiń bas ımamy Bekzat Syzdyq.

Aıta keteıik, meshit basshylyǵy buǵan deıin «Baspanaǵa jol» qaıyrymdylyq sharasy arqyly úısiz júrgen 7 otbasyǵa baspana satyp alyp bergen bolatyn. Bul sol qaıyrymdylyq istiń jalǵasy ispettes.