Jetisaı mektepterinde robototehnıka kabınetteri kóbeıip jatyr

JETІSAI. QazAqparat – Túrkistan oblysy Jetisaı aýdanyndaǵy mektepter robototehnıkalyq qural-jabdyqtarmen qamtylýda. Qazirgi tańda 13 bilim mekemesine tolyǵymen zamanaýı qurylǵylar berilgen, dep habarlaıdy QazAqparat tilshisi.

Bıyl aýdan basshysynyń qoldaýymen taǵy 3 mektepte IT-synyp ashý úshin jergilikti bıýdjetten 24 mln 147 myń teńge qarjy qaralyp otyr.

Óz kezeginde jastar da robototehnıka boıynsha bilimin jetildirip, túrli saıystarǵa qatysýda. Jýyrda «ROBOTECH – 2020» tehnologııasy negizinde aımaqtyq ashyq chempıonat ótken bolatyn. Onda syzyq boıymen júrý, robosýmo-ıntellektýaldy oıyny, robosýmo, kegelrıng-kvadro jáne báıge atty 5 sanattan turatyn saıysqa Jetisaı jáne Maqtaaral aýdandarynan 60 komandanyń quramynda 120 oqýshy qatysty.

Sharany aýdandyq «Jastar resýrstyq ortalyǵy» KMM men Túrkistan oblysy ádistemelik kabınetiniń, bilim bólimi men «ROBOTURKISTAN» Túrkistan oblystyq bilim jáne sporttyq robototehnıka federatsııasy uıymdastyrǵan.

Chempıonat qorytyndysy boıynsha jetisaılyq oqýshylar úzdikter qatarynan kórinip, arnaıy marapatqa ıe boldy.