Jetisaı aýdanynyń ákimi ár turǵynnyń ótinishi nazardan tys qalmaıtynyn jetkizdi

JETІSAI. QazAqparat – Túrkistan oblysy Jetisaı aýdanynyń ákimi Jamantaı Beısenbaev turǵyndardy jeke máselelerimen qabyldady. Qoǵamdyq qabyldaýǵa qala, kent jáne aýyldyq okrýgterden kelgen azamattar aýyz sý, jol, bilim, tazalyq, elektr jaryǵy men turǵyn úı máselelerin kóterdi, dep habarlaıdy QazAqparat tilshisi.

Ákimge aryzyn aıtyp kelgen turǵyndar sonymen qatar bilim sapasy, aýyldardaǵy tazalyq, elektr jaryǵy jáne turǵyn úı máselesin jetkizdi. Olardy muqııat tyńdaǵan aýdan basshysy barlyq problemalar nazardan tys qalmaıtynyn atap ótti.

«Bizdiń aýdanda baspanasy joq kópbalaly analar men múmkindigi shekteýli jandar bolmaýy tıis. Bul baǵytta tıisti jumys atqarylyp jatyr. Halyq densaýlyǵynyń negizgi tetiginiń biri – aýyz sý máselesin de kezeń-kezeńimen sheship kelemiz. Bıyl atqarylǵan jumystar az emes, aldaǵy jylǵa da josparlar aýqymdy. Sondyqtan biz halyqtan jyraqta emes, eldiń arasynda júrip, adal eńbek etýge tıispiz», - dedi aýdan ákimi Jamantaı Qanaıuly.

Jıyn barysynda aýdan basshysyna bazynasyn aıtyp kelgen ár turǵynnyń máselesi hattamaǵa engizilip, tıisti sala mamandaryna tapsyrmalar berildi. Berilgen tapsyrmalardyń oryndalýyn aýdan ákim jeke baqylaýyna alatynyn aıtty.