Jetisaı aýdanynda bir kúnde bes aýylǵa tabıǵı gaz berildi
Atap aıtqanda, kógildir otynǵa qol jetkizgen aýdannyń Sh.Dildábekov aýyl okrýgine qarasty Dostyq, Baıdala, Zerdeli aýyldary men Atameken aýyldyq okrýgine qarasty Tyńdala jáne Qoǵaly eldi mekenderi. Aımaq basshysy Dostyq aýylyndaǵy gaz torabyn iske qosý rásimine qatysyp, endigi kezekte 5 myńǵa jýyq halqy bar bes aýyl turǵyndarynyń kómir tasyp, kúl shyǵarmaıtynyn jetkizdi.
«Qurmetti túrkistandyqtar! Qadirmendi Jetisaı aýdanynyń turǵyndary! Búgin sizder men bizder kópten kútken úlken qýanyshtyń kýási bolǵaly otyrmyz. ıAǵnı, búgin Túrkistan oblysyna qarasty Jetisaı aýdanynda bes eldimekenniń turǵyndary tabıǵı gazǵa qol jetkizip otyr. Qazirgi tańda Jetisaı aýdanynda 104 eldi mekenniń 46-sy, ıaǵnı 22 096 abonent tabıǵı gazben qamtylsa, bul aýdandaǵy eldi mekenderdiń jalpy sanynyń 44,2 paıyzyn qurap otyr. Al abonent sany boıynsha 74,4 paıyzǵa jetti», - dedi Janseıit Túımebaev.
Jalpy bıyl Jetisaı aýdanyndaǵy eldi mekenderdi gazdandyrý maqsatynda 5 nysannyń qurylysyna oblystyq bıýdjetten 615,4 mln teńge qaralǵan bolatyn. Onyń ishinde 1 nysannyń qurylys-montaj jumystary 2018 jyldyń shilde aıynda aıaqtalsa, 3 eldi mekenniń qurylysy jyl sońyna deıin el ıgiligine tapsyrylady dep kútilýde.
Jetisaı aýdanynyń damý tujyrymdamasyna sáıkes 2019-2025 jyldary osy óńirdegi 104 eldi mekenniń bári derlik 100 paıyz gazben qamtylady degen jospar bar.
Jetisaıǵa jumys saparynda aımaq basshysy Jańaaýyl aýyldyq okrýgi Yntymaq eldi mekenindegi Turar Rysqulov atyndaǵy 600 oryndyq jańa mekteptiń ashylý saltanatyna da qatysty. Buǵan deıin úsh aýysymda bilim berip kelgen orta mektep ujymyn búgingi qýanyshymen quttyqtaǵan oblys ákimi jańa, zamanaýı talapqa jaýap beretin eńseli de, keremet mekteptiń synyptaryn aralap kórdi. Ondaǵy shákirttermen tildesip, olardyń sabaqtaryn úzdik oqyp, elimizdiń úlgili azamattary bolýǵa shaqyrdy.
Odan soń, ákim Jetisaı qalasyndaǵy «AIIG Kazakhstan» JShS-niń maqta zaýytynda boldy. Atalǵan zaýytta 660 adam jumys isteıdi. Qýattylyǵy jylyna 40 myń tonna. 2013 jyly qurylǵan zaýytta maqta talshyǵy, tehnıkalyq tuqym, lınt, ýlıýk daıyndalady. Jalpy aýmaǵy 5,6 gektardy quraıdy. Munda óndirilgen ónimder negizinen elimizdiń barlyq aımaǵyna taratylady.
Oblys ákimi zaýyt jumysshylarymen kezdesip, aýdandaǵy «Ozat terimshi, «Eń úzdik kombaınshy», «Eń úzdik terimshi», «Eń úzdik maqta zaýyty» nomınatsııalarynyń ıegerlerin marapattap, syı-sııapat tabystady.
Jalpy Jetisaı aýdanynda maqta terý naýqanynyń aıaqtalýyna sanaýly kúnder qaldy. Qazirgi tańda aýdan boıynsha 48226,8 gektar maqta alqabynan 126 myń 192 tonna shıtti maqta jınaldy. Aq altynnyń túsimdiligi ár gektarynan 26,2 tsentnerdi qurady.