Jetibaıda munaı kompanııasynan jumys surap, ashtyq jarııalaǵandarǵa ákimdik jaýap berdi
29 naýryzdan bastap «E-otinish» portaly arqyly ashtyq jarııalaý túrindegi narazylyq aktsııasyna barlyǵy 13 ótinish tústi.
Qazirgi ýaqytta ótinishter ýákiletti memlekettik organdarda qaralyp jatyr.
Aıta keteıik, tamaqtan bas tartý arqyly aktsııa ótkizý qoldanystaǵy zańnamamen rettelmeıdi.
Óz kezeginde Qaraqııa aýdanynyń ákimdigi oblys ákimdiginiń basqarmalary, aýdan prokýratýrasy jáne basqa da múddeli organdarmen birlesip, narazylyq bildirgen jumyssyzdarǵa túsindirý jumysyn jalǵastyryp jatyr.
Eń aldymen, Qaraqııa aýdanynyń ákimdigi barlyq jumyssyzdyń birden munaı salasynda jumys isteýi múmkin emestigine, jumyssyzdar ákimdik usynǵan jumys oryndarynan bas tartatynyna nazar aýdartqysy keledi.
«Sondaı-aq «Mańǵystaýmunaıgaz» AQ-nan bos jumys oryndaryn bólýde jumyssyzdar tarapy «70-te 30», ıaǵnı Jetibaı kentiniń turǵyndary 70 paıyzyna, al qalǵan 30 paıyzy Qaraqııa aýdanynyń basqa aýyldaryndaǵy jáne oblystyń basqa aýdandaryndaǵy jumyssyzdarǵa berý talaby qoıylǵan. Qoıylǵan talapty basqa aýyl, aýdan turǵyndaryna negizsiz dep sanaımyz. Bul rette Qaraqııa aýdanynyń Quryq aýyly men Mańǵystaý oblysynyń jumyssyz turǵyndary bos jumys oryndaryn bólýde ádilettilikti talap etip otyr. Qazirgi ýaqytta narazylyq bildirýshiler memlekettik organdardyń túsindirip jatqan aıqyn jáne obektıvti faktilerin qabyldaýdan bas tartty. Jınalǵandar «munaı salasynda jumys isteımin» degenderdiń barlyǵyn birden jumysqa ornalastyrý múmkin emes, basqa salalarǵa jumysqa ornalasý múmkindikterin paıdalaný qajet degen shyndyqty qabyldaýy qajet. Barlyq másele konstrýktıvti dıalog arqyly, qoldanystaǵy zańnama aıasynda sheshilýi tıis» dep málimdedi aýdan ákimdigi.
Sondaı-aq Qaraqııa aýdanynyń ákimdigi narazylyq bildirýshilerge zańsyz áreket jasaǵan jaǵdaıda zańda belgilengen jaýapkershilik bar ekenin eskertti.