Jeti jyldyq ókilet bıylǵy prezıdent saılaýyna deıin engizilýi kerek – Erlan Qoshanov

NUR-SULTAN. QazAqparat – QR Parlamenti Májilisiniń tóraǵasy Erlan Qoshanov aldaǵy prezıdent saılaýy men prezıdent ókiletiniń merzimi týraly túrli paıymdar jaıynda pikir bildirdi, dep habarlaıdy QazAqparat tilshisi.

«Jańa Qazaqstan» degen depýtattyq toptyń usynysy boldy. 7 jyl merzimge bir ǵana márte saılanýdy osy bıylǵy prezıdent saılaýynan bastaý jóninde aıtyp otyrmyn. Óz basym osyny qoldaımyn. Sebebi qazir bizde saıası reformalar júrip, iske asyp jatyr. Reformalardyń biri – jańa siz aıtyp otyrǵan Prezıdent ókiletiniń merzimi. Bul bizdiń memleketimizdiń bolashaǵy úshin óte qajet, óte mańyzdy. Óıtkeni bizde prezıdenttik basqarý formasy jumys isteıdi. Sondyqtan osy mańyzdy ózgeris bıylǵy saılaýdan bastalýy kerek dep esepteımin», - dedi ol Májilistiń jalpy otyrysynan keıin BAQ ókilderine bergen suhbatynda.

Onyń paıymynsha, atalǵan reformany ári qaraı taǵy 5 jylǵa soza berýdiń qajeti joq.

«Eger bıyl 7 jyldyq merzimdi engizbesek, reforma taǵy 5 jylǵa sozylyp ketedi. Ol máseleni aqparat quraldary da, telegram-kanaldar da aıtyp jatyr. Ótken joly depýtattar toby da bul máseleni kótergen bolatyn. Eger bıyl sol júıe engizilmese, prezıdent bıyl 5 jylǵa saılansa, saılanǵan prezıdenttiń 5 jyldan keıin taǵy 7 jylǵa saılanýǵa quqyqtyq múmkindigi paıda bolady. Bul nárseni de shekteýimiz kerek. Muny shekteý úshin taǵy 5 jylǵa reformany sozbaı, bıyl 7 jyldyq merzimdi engizip, sonymen prezıdent saılaýyn ótkizýimiz kerek dep oılaımyn», - dedi Erlan Qoshanov.