Jeti jylda Qazaqstandaǵy jol apaty eki esege qysqardy – ІІM
«Jol qaýipsizdigin qamtamasyz etý – ishki ister organdarynyń basty mindetteriniń biri. Jalpy eldegi jol qaýipsizdiginiń jaı-kúıi apattylyqtyń jekelegen kórsetkishterin tómendetýge yqpal etti. Respýblıkada eń kóp jol apaty 2013 jyly tirkelgen edi, onda 23 359 jol-kólik oqıǵasy tirkelip, 3 037 adam qaza tapty jáne 30 myńǵa jýyq (29 872) jaraqat aldy», - dedi Serik Túsipov mınıstrlikte ótken onlaın brıfıngide.
Sońǵy jeti jylda, 2013-2020 jyldary Іshki ister mınıstrligi men múddeli memlekettik organdar qabyldaǵan keshendi sharalar arqyly jol-kólik oqıǵasy sany eki esege nemese 42%-ǵa azaıdy. Al qaza bolǵandar sany 34%-ǵa, jaraqat alǵandar – 40%-ǵa tómendegen.
2020 jyly pandemııaǵa baılanysty karantın sharalary kezinde oblysaralyq tasymaldar shektelip, turǵyndardyń kólikpen júrýi azaıǵandyqtan, apat kórsetkishteri de azaıdy: jol-kólik oqıǵasy – 19%-ǵa, qaza tapqandar – 17%-ǵa jáne jaralanǵandar – 20%-ǵa.
«Sonymen birge, jyl basynan beri qozǵalys qarqyny qaıta óskenin, el avtoparkiniń tehnıkalyq jaǵdaıyn, jol-kólik ınfraqurylymyn damytý jónindegi sharalardyń jetkiliksizdigin eskere otyryp, jekelegen apat kórsetkishteriniń ósýi baıqalady. Máselen, bıylǵy úsh aıda jol-kólik oqıǵasy sany 4%-ǵa (2 740-tan 2 621-ge deıin) jáne jaralylar sany 1%-ǵa (3 634-ten 3 605-ke deıin) tómendegen bolsa, qaza bolǵandar sany 12%-ǵa – 325-ten 363-ke deıin ósken», - deıdi S. Túsipov.