Jeti jylda Abaı óńirine 2 trln teńgeden astam ınvestıtsııa salyndy – Danıal Ahmetov
«Osy jyldyń mańyzdy oqıǵasy – Shyǵys Qazaqstannan bólý arqyly Abaı oblysynyń qurylýy. Jańa oblys quramyna engen qalalar men aýdandardy áleýmettik-ekonomıkalyq damytý úshin júrgizilgen jumystardy qysqasha baıandaıyn. Sońǵy 7 jylda Abaı óńirine 2 trln teńgeden astam ınvestıtsııa salyndy. Nemese ShQO boıynsha ınvestıtsııanyń jalpy kóleminiń 53 paıyzy. Aýqymdy jobalar iske asyryldy, olar – qýaty jylyna 50 mln tonna mys keni bolatyn Aqtoǵaı taý-ken baıytý kombınatynyń ekinshi kezeńi. Onyń ınvestıtsııa kólemi - 760 mlrd teńge, jylyna 2 mln tonna altyn kenin óndiretin Baqyrshyq taý-ken baıytý kásiporny, ınvestıtsııasy – 134 mlrd teńge. Semeı qalasynda ósimdik maıyn óndirý boıynsha qýaty 300 myń tonna maı-ekstratsııalyq zaýyty», - dedi D. Ahmetov Ortalyq kommýnıkatsııalar qyzmetinde ótken baspasóz máslıhatynda.
Sońǵy 7 jylda Abaı óńiri boıynsha ónerkásip óndirisi kólemin 5 esege, aýyl sharýashylyǵyn 2,4 esege arttyrýǵa múmkindik boldy. Shyǵys Qazaqstan oblysynyń jalpy kólemindegi Abaı oblysynyń jalpy óńirlik ónim úlesi 36 protsentti qurap, 1,9 trln teńgege jetti. Bul 2015 jylǵy deńgeıinen 2,3 esege kóp nemese 1,1 trln teńgeni quraıdy. Jan basyna shaqqandaǵy jalpy óńirlik ónim 2,9 mln teńge boldy.
Sonymen birge, ShQO ákimi bıýdjettik ınvestıtsııanyń aıtarlyqtaı óskenin atap ótti.
«2015-2022 jyldary oblysqa respýblıkalyq bıýdjetten 390 mlrd teńge damý transferti alyndy. Onyń ishinde biz Abaı óńirine 200 mlrd teńge nemese jalpy kólemniń 51 paıyzyn jumsadyq. Sondaı-aq, oblystyq bıýdjetten qosymsha 154 mlrd teńge bólik. Barlyǵy 354 mlrd teńge bıýdjettik ınvestıtsııa salyndy», - dedi Danıal Ahmetov.