Jeti jyl boıy halyqaralyq izdeýde júrgen kúdikti Túrkistan oblysynan ustaldy
Túrkistan oblysy polıtsııa departamentiniń ekstremızmge qarsy is-qımyl basqarmasynyń qyzmetkerleri 7 jyl boıy halyqaralyq izdeýde júrgen kúdiktini ustady.
Esirtkige baılanysty qylmys jasaǵany úshin halyqaralyq izdeýde jarııalanǵan Ózbekstan azamaty Saryaǵash aýdandyq polıtsııa bóliminiń ýaqytsha ustaý ızolıatoryna qamaldy.
«Túrkistan oblysy polıtsııa departamentiniń qyzmetkerleri qoǵamdyq tártipti qamtamasyz etýge, qylmystardyń jolyn kesýge jáne qylmyskerlerdi, onyń ishinde izdeýde júrgenderdi ustaýǵa baǵyttalǵan jedel-profılaktıkalyq is-sharalardy turaqty negizde júrgizip keledi. Kezekti profılaktıkalyq is-sharalar barysynda 2016 jyldan beri izdeýde júrgen kúdikti ustaldy. Qazirgi ýaqytta polıtseıler tarapynan atalǵan azamatty ekstradıtsııa jumysy júrip jatyr», - delingen Túrkistan oblysy polıtsııa departamentiniń baspasóz qyzmeti taratqan aqparatta.