Jeti mıllıon teńge jymqyrǵan bas býhgalterge qatysty sot úkimi shyqty

ASTANA. QazAqparat – Jambyl oblysy T.Rysqulov aýdanynyń prokýratýrasy «Qulan-Energo Jylý» ShJQ KMK bas býhgalteriniń 7 mıllıon teńge jymqyrý faktisin anyqtady, dep habarlaıdy QazAqparat.

Aýdan prokýratýrasy «Qulan-Energo Jylý» ShJQ KMK qyzmetine bıýdjet qarajatyn jumsaý máselesine taldaý júrgizdi.

Bas prokýratýranyń málimetinshe, taldaý barysynda kásiporynnyń bas býhgalteri tólem tapsyrmalarymen KMK-nyń bıýdjet qarajatyn óziniń shotyna aýdarǵany anyqtaldy. Bul rette, óziniń qylmystyq áreketterin jasyrý maqsatynda tólem tapsyrmalarynyń baǵanyna taýarlar, kásiptik, ǵylymı jáne tehnıkalyq qyzmetter úshin tólemder retinde tólemniń maqsatyn kórsetken.

Osy fakti boıynsha aýdan prokýratýrasy QK-niń 189-babynyń 3-bóligi 1-tarmaǵy boıynsha qylmystyq is tirkelip, Jambyl oblysy boıynsha Ekonomıkalyq tergep-tekserý departamentine sotqa deıingi tergeý júrgizý úshin tapsyryldy. Tergeý aıaqtalǵannan keıin, qylmystyq is sotqa joldandy.

Aýdandyq sottyń 23.06.2023 jylǵy úkimimen kásiporynnyń bas býhgalteri qylmystyq quqyq buzýshylyq jasaǵany úshin kináli dep tanylyp, 3 jyl merzimge bas bostandyǵyn shekteý túrindegi jaza taǵaıyndaldy. Sondaı-aq kommertsııalyq jáne ózge de uıymdarda 3 jyl merzimge materıaldyq-jaýapty laýazymdardy atqarý quqyǵynan aıyrý túrindegi qosymsha jaza taǵaıyndaldy.

Úkim zańdy kúshine endi.

Zańsyz aýdarylǵan aqsha memleketke tolyq kólemde qaıtaryldy.