Jermen aınalysyp júrgen kásipkerlerdiń 80 paıyzy óz ultymyzdyń azamattary - Ázimbaı Ǵalı

ASTANA. QazAqparat - Úkimettiń eskermegenin Prezıdent eskerdi. Óıtkeni Elbasy aıtqandaı halyq qalamaǵan, qoldamaǵan zańnyń qajeti shamaly, dedi Aıqyn gazetine bergen pikirinde saıasattanýshy Ázimbaı Ǵalı.

«Elbasy aıtqandaı halyq qalamaǵan, qoldamaǵan zańnyń qajeti shamaly. Onyń arty ýshyǵa berse, jaqsylyqqa ákelmeıtinin Elbasy der kezinde ańǵardy. Óziniń ustanymyn aıtty. Demek, Prezıdent esh nárseni qalt jibermeı baqylap otyr degen sóz. Árıne, jer reformasy kerek. Óıtkeni naryq zańy sony qalaıdy. Ony Elbasy da aıtyp ótti. Biraq dál mynadaı jarymjan zańmen jumys isteýge bolmaıdy. Jer jekemenshikke berilgeni durys. Óıtkeni elimizdegi jerdi emip, jermen aınalysyp júrgen kásipkerlerdiń 80% - óz ultymyzdyń azamattary», - dedi saıasattanýshy.