Jerleý kompanııalaryna derek satqan astanalyq polıtseıler jumystan shyǵaryldy
Bul týraly QR Sybaılas jemqorlyqqa qarsy is-qımyl agenttigi Preventsııa departamentiniń basshysy Anar Jarova málimdedi.
«2019 jyldyń 7 aıynda Jemqorlyqqa qarsy qyzmet pen onyń aýmaqtyq organdary túrli memlekettik organdarǵa 1900 usynym berdi. Olardyń basym bóligi ishki ister, jergilikti atqarý organdaryna, bilim berý mekemelerine, Memlekettik kirister komıtetine jáne kvazımemlekettik sektor uıymdaryna jiberildi. Mundaı tásil atalǵan salalardaǵy quqyqbuzýshylyqtardyń sebebin anyqtaý men syn-qaterlerdi azaıtýǵa múmkindik beredi», - dedi Anar Jarova QR Sybaılas jemqorlyqqa qarsy is-qımyl agenttiginde ótken brıfıngte.
Spıker elordalyq polıtseıler men jerleý rásimin júrgizetin komanııalardyń sybaılastyǵy jóninde aıtyp berdi.
«Jerleý rásimin júrgizetin kompanııalar adam qaıtys bolǵan úıge baryp, olardyń jaǵdaıyna qaramastan óz qyzmetterin usynady. Olarǵa aqparat qaıdan jetti degen qısyndy suraq týyndaıdy. Jemqorlyqqa qarsy qyzmet polıtsııa qyzmetkerleriniń jerleý kompanııalarynan syıaqy alyp, derekter bazasymen bóliskenin anyqtady», - dedi ol.
Atalǵan faktilerdi tergeý arqyly Nur-Sultan qalasy Almaty jáne Saryarqa aýdandaryndaǵy polıtsııa basqarmalarynyń kezekshi bólimderiniń 9 qyzmetkeri teris pikirmen jumystan shyǵaryldy. Olardyń basym bóliginde maıor ataǵy bolǵan.
«Tıisti baqylaý júrgizilmegeni úshin olardyń tikeleı basshylary da tártiptik jaza men qatań eskertý aldy. Mundaı faktiler barlyq jerde bolady dep oılaımyz. Osyǵan baılanysty, sybaılas jemqorlyqqa beı-jaı qaramaıtyn azamattarǵa agenttiktiń «1424» Call-ortalyǵyna habarlasýyn suraımyz», - dedi Anar Jarova.