Jerimiz baıtaq bolǵanymen, biz az halyqpyz, elde laıym beıbitshilik bolsyn – professor

NUR-SULTAN. QazAqparat – Almaty turǵyny, ál-Farabı atyndaǵy Qazaq ulttyq ýnıversıteti tarıh fakýltetiniń Qazaqstan tarıhy kafedrasy meńgerýshisiniń mindetin atqarýshy, professor, oqytýshy Aqmaral Ysqaq eldegi jáne Almatydaǵy ahýalǵa qatysty óz oıyn ortaǵa saldy, dep habarlaıdy QazAqparat tilshisi.

«Ózim Almaty qalasynyń turǵynymyn. Bolyp jatqan oqıǵa týraly teledıdar arqyly bilip otyrmyn. Syrtqa shyqqan emespin, sondyqtan óz kózimmen eshteńe kórgen joqpyn. Basqa óńirlerge qaraǵanda Almatyda jaǵdaı kúrdeli. Elde bolǵan búlikshiliktiń qanshalyqty lańkestik nemese sodyrlardyń isi ekenine qatysty baǵa bere almaımyn. Qazir halyq arasynda túrli aqparat tarap jatyr, onyń ishinde rasy da bar, jalǵany da bar. Sondyqtan aldymen shyndyqqa kóz jetkizip, senimdi derekke súıengen durys. Anaý aıtty, mynaý degennen aýlaq bolaıyq», - dedi Aqmaral Ysqaq.

Onyń aıtýynsha, halyqtyń Konstıtýtsııa boıynsha óz oıyn, únin bılikke jetkizýge quqyǵy bar, biraq búlikshilik pen arandatýshylyqqa jol berilmeýi tıis.

«Árıne, el azamaty, Almaty turǵyny retinde bolǵan bolǵan jaıtqa júregim aýyrady. Qanshama qan tógildi. Onyń arasynda órimdeı jastar da bar. Ózim de anamyn. Beıbit elde bundaı bolmaýy tıis. Memleket basshysy el amandyǵy men tutastyǵy úshin qabyldap jatqan sheshimderdi qoldaımyn. Endi Prezıdent júktep otyrǵan mindet ispen dáleldense, quba-qup bolar edi. Jerimiz baıtaq bolǵanymen, biz az halyqpyz, sondyqtan elde laıym beıbitshilik bolsyn», - deıdi ol.